Mizoram mipuite lainatna hmangsual te YMA chuan a dim dawn lo tih sawi

Central YMA President Lalhmachhuana chuan thenawm ram Zofate awmnaa tualchhung buaina a awm avanga Mizoram in unaute tana lainatna a lo lantir chu hmangsualin ruihhlo tawlhna remchanga hmang an awm nia a lan thu sawiin, hetiang mite hi manchhuah an nih chuan YMA chuan a dim dawn lo tih a sawi.

Central YMA hnuaia ruihhlo dotu, Kumpuan Sub-Committee in December 12, 2023 atanga kumin September 9 thlenga ruihhlo a man chu nimin khan an tichhia a, hemi puala hun hman ah Central YMA President chuan, YMA-in ruihhlo do kum a puan tirh, kum 2004 chho ah khan Heroin an man tam zawk hi a Gram (hawng) in a ni a, kum 2021 hnu lamah erawh a Kilogram-a man tur a tam tawh hle a, thenawm ram buai hnua lo tuamhlawm ngaite Mizoram in a lo tuamhlawm hnu hian misual thenkhatin remchanga la in ruihhlo tawlh hi a hluar zual em ni, tih theih a ni ta tih a sawi a. “Ruihhlo man a tam chuan Supply rawn lut a tam tihna a ni. Kan lainatna a dik lo zawnga rawn hmang tangkaitu hi manchhuah an nih phawt chuan YMA chuan lainatna tel loin kan bei dawn,” a ti.

Central YMA President chuan Passenger phur leh mimal lirthei pawh ruihhlo phurhna atana hman te man an nih chuan an license cancel sak nghal mai tura an ngai laiin, a ni thin lo fo tih a sawi a. Two Wheeler Taxi-ah pawh ruihhlo home delivery ti tawk an awm tih sawiin, passenger phur lirtheite dinhmun hi thuneituten a khat tawkin an enfiah a tul hle tih a sawi a. Hausak thut duh vanga ruihhlo tawlh an awm bawk tih sawiin, “Kan ramah hausak dan hriatchian loha hausa thut an awm chawk. Kan thalaite nunna thapa hausak tumte hi YMA chuan a ral thlir mai mai dawn lo, a do zel dawn,” a ti bawk.

YMA in ruihhlo an man sa te hi Synod Moderator Rev Vanlalnghaka chuan Central YMA Office kawtah a tiral a, a tam zawk erawh mipui nawlpui hriselna atana pawi lo thei turin Phunchawng-ah tihral a ni a, a vaiin Rs. 5,58,45,780 hu tihchhiat niin Heroin Hawng 690, Methamphetamine mum 112,000, Ganja kg. 158.410 leh ruihtheih thil dang te a tel a ni.