Insumdawn tawnna tihtawp vangin harsatna tawk

Myanmar atanga dan kalha kuhva lo lut ni a sawi CBI-in an chhui dawn tih chhuanlam a Zokhawthar Indo-Myanmar Border Trade Centre a insumdawn tawnna tihtawp a nih avangin ramri a awmte'n harsatna an tawk.

 Gauhati High Court thupek angin Myanmar atanga dan kalha kuhva lo lut ni a puhna chu Central Bureau of Investigation (CBI)-te'n an chhui dawn a, hemi ti tur hian Zokhawtharah CBI-te an kal dawn avangin insumdawn tawnna hi Customs Official-te chuan July 25 khan an titawp vek a. Zokhawthar VCP Lalmuanpuia chuan CBI te hi August thla bul khan an thleng chhova, Champhai nen kartawnin rei vak lo an cham a, an haw leh mai niin a sawi a. CBI ho haw hnu pawha ramri a chengte thil lei leh hralh khap zui a ni chu an lungawi loh thu a sawi a. Tun dinhmunah Zokhawthar leh a chhehvel khua-ah eichawp leh nitin mamawh thil a vang tawh a, a awmchhun pawh a man a to tawh hle niin an sawi a ni.

Ramri a insumdawn tawnna tihtawp a nih avang hian dawr neite bakah puakphur (bungraw hlangtu) 500 dawn chu hna nei lovin an awm mek a. Bungraw phur leh mihring phur lut leh chhuak an awm meuh loh avangin thingpui dawrte pawhin dawrtu an nei tawh mang lo niin an sawi bawk a ni. Zokhawthar leh Khawmawi inkara insumdawn tawnna tur Zokhawthar Border Trade Centre-a Land Customs Station hi March 25, 2015 khan hawngin mumal taka ram pahnih insumdawn tawnna hi kalpui a ni.