District tinah QRT tha taka kalpui tum niin Serchhip District-a QRT te tan Training neih a ni
Disaster Management & Rehabilitation (DM&R) Department Serchhip leh Mizoram sawrkar-a Disaster Management Authority tangkawp in an buatsaih he Training hi DM&R Department-a Joint Director Malsawmtluanga chuan hawngin Quick Response Team hi mumal taka neih a nihna a la rei lo hle tih sawiin, District zawng zawngah QRT tha taka kalpui tura hmalak mek a nih thu leh Serchhip District chu Aizawl pawna mumal taka QRT kan neihna hmasa tur an nih dawn avangin midang entawn tlaka an awm a ngai dawn tih a sawi a. An hnathawh chu ‘sawrkar hna, a ngheta thawk an ni lo,’ tih rilru putna chi a ni lo tih vawng tlat tura chahin; “Sum leh pai-a hlawkna lam in ngaihtuah chuan in thawk rei peih lovang, tuina tak tak leh inpekna nena thawh chi a ni,” a ti a. An hna chu nunna thap-a thawh a tul chang a awm fo dawn thu leh rilru leh taksa hrisel tak neih a ngaih thu a sawi a, zuk leh hmuam, ruihtheih thila fifhlim a, hriselna ngaihpawh turin a chah bawk.
Hei bakah hian hna harsa leh hautak takte tih a tul huna sawrkar leh mipuite hmachhuan tur an nih hria a, midang zawng zawng aia rintlak leh hmahruaitu ni tura inbuatsaih tura chahin, thahnemngai taka training nei turin a fuih a; harsatna tawkte a langlo lama tanpuitu tur an nih dawn thu leh fakna leh chawimawina an dawng kher dawn lo tih hre saa, inpekna tak tak leh tuina tak tak nena thawk turin a chah a, rilru hrisel leh huaisenna nen QRT entawn tlak leh District mipuite innghahna tlak ni turin duhsakna a hlan nghal bawk a ni.
He hunah hian DM&R-a Deputy Director Lalrokima Chenkual chuan chhiatrupa a thlen changa chhanchhuah hna thawk tur Sipaiin Quick Response Force (QRF) an neih zulzuiin Quick Response Team (QRT) hi Disaster Management Authority in a din a nih thu a sawi a. Kum 2019 khan District zawng zawngah QRT din vek tura rel ni tawhin, a kalphung turte pawh duan a nih tawh thu a sawi a. QRT member turte hi anmahni inpekna mai bakah an chhungte remtihna nen thlapa tih nise an duh thu a sawi a, chhanchhuahna hna an thawh laiin hliam tuar ve thei an nih avangin sawrkar atangin zangnadawmna te pawh buatsaih sak an nih bakah, District lama Disaster Management & Rehabilitation Department ten insurance lo tihsak se an duh tih a sawi bawk.
Nimin-a Training hawnna hun hi Serchhip Addl. DC Lalrinzuala chuan kaihruaiin Serchhip District-ah vanneihthlak takin chhiatna nasa tak kan nei tam lo tih sawiin, mahse nasa taka ruah a sur thin avangin beisei loh lama chhiatna nasa zawk thleng palh thei anih avangin DEOC leh QRT te tan training neih a, a tul huna chhuak mai thei tura inpeih a tul avangin training hi buatsaih ngei nise tia hmalak a nih thu a sawi.
Serchhip District-a QRT-ah hian mi 14 awmin an zinga 13 te chu Serchhip niin midang pakhat hi Thenzawl khua a ni thung a, Serchhip khua te hi Field Veng-a mi 3, New Serchhip, Kawnpui leh Leisang Veng-ah 2 theuh leh Chanmari, Hmar Veng, Dinthar leh Chhim Veng-ah mi pakhat theuh an ni a. He Training hi chawlhkar khat chhung neih tura ruahman niin mithiam ten chhiatna chi hrang hrang lo thlen thulha chhanchhuah leh chhawmdawl hna thawh dan hrang hrangte an zirtir dawn a, a remchan angin a tak anga tihchhinna te pawh neih a ni ang.
Nimin-a Training hawnna hunah hian SDO (Sadar) Rebecca Laldinmawii Hrahsel leh SDC Dr. Marylin Lalruatkimi te pawh telin Zothansanga Hmar chuan lawmthu sawiin he hun hi a khar a ni.
Comments
Post a Comment