Chief Minister Lalduhoma’n USA-a a kal chhan ber chu inpumkhatna kawng zawng turin a nih thu a sawi

Chief Minister Lalduhoma chuan USA-a a kal chhan ber chu inpumkhatna kawng zawng turin a nih thu sawiin, “Engtikah emaw chuan, hnam-a min dintu Pathian chakna hmangin, hnam ropui tak ni turin, rorelna pakhat hnuaiah kan la ding chhuak ang tih i ring tlat ang,” a ti.

USA-a zin mek Chief Minister Lalduhoma hian Indiana State, USA-a cheng Chin Community ten nizan hmasa a Townhall Meeting Programme an buatsaih a hmanpuina ah USA-a a kal chhan ber pawh chu inpumkhatna kawng zawng turin a ni tih sawiin, “Unau kan ni a, inthen thei kan ni lo tih hi ka chah nawn leh duh che u a ni,” a ti a. “Engtikah emaw chuan, hnam-a min dintu Pathian chakna hmangin, hnam ropui tak ni turin, rorelna pakhat hnuaiah kan la ding chhuak ang tih i ring tlat ang u. Ram hian ramri a nei a, hnam erawh chuan ramri a nei lo. Sawrkar pathum hnuaia diklo taka thehdarha kan awm hi engtik lai mahin kan pawm ngai lovang,” a ti a. Kan inkarah hnamdang tumah tlazep awm lovin ram thleng inzawmin kan la awm thu sawiin, “Hei hi Pathian malsawmna ropui tak a ni. Inpumkhatna thinlung pu theuh turin tih tak meuhin ka ngen che u in, thawhho puiah ka sawm che u a ni. Pathian hian hmanrua a ngah em em a, ‘Chakna ni lovin, thiltihtheihna ni hek lovin, ka thlarau zawkin le’ tih hi kan innghahna ni fo se. Kan Pathian hnenah bang lovin i tawngtai zel ang u,” a ti bawk.

Chief Minister chuan USA-ah awm kan lo thahnem ve ta hle tih sawiin, Indianapolis-ah ringawt pawh mi 30,000 chuang an awm thu a sawi a. Kohhran inpumkhatna a pawimawh thu sawiin, “Mizoram-ah pawh Ecumenical Movement hi kalpui zel a ni a. Tunah chuan Kohhran hrang 8 ten Council of Churches in Mizoram an lo din thei dawn ta a. October 27, 2024 hian Mission Veng Presbyterian Biak In-ah a hawnna ropui takin kan nei dawn a ni,” tiin USA a Kohhran te pawh mahni pawl thiat kher lova an zavaia huap zo tur thawhhona huang lo an din theih chuan a lawm tur thu a sawi a. NGO pawl hrang hrang pawh an tam hle tih sawiin, “Kan zavaia min huapzo NGO pakhat nei thei ila a lawmawm ngawt ang,” a ti bawk.