CDF - Hualngoram ten an mi man 2 an chhuah

Pathianni hmasa a Chin Defence Force (CDF) - Hualngoram hovin an ruk bo leh Tan In a an tantir Zokhawthar tleirawl Laltlanhlua leh Eliza (kum 16 mi ve ve)-te chu Zirtawpni zan khan an rawn chhuah.

Zokhawthar khawtlang hruaitute leh YMA Branch hruaitute sawi danin khawtlang hruaitute leh tlawmngai pawlte'n nasa taka nawr a CDF-Hualngoram hruaitute nena an inbiak hnuah heng tleirawl pahnihte hi chhuah an ni a. Myanmar ramchhung Khawmawi khua ah chhuahin Zirtawpni zan khan Zokhawthar lamah khawtlang hruaitute hian an hruai thleng a ni. Laltlanhlua te thiandun an rukbo chhan hi CDF mi pakhat kutthlak-a an puh vang niin an sawi a, Zokhawthar hruaitute erawh chuan chutiang chu a awm lo niin an sawi ve thung. Nilaini chawhma khan Laltlangvala leh Tatea (kum 18 mi ve ve) te chu CDF te hian an man bawk a, mahse, anni hi chu Zokhawthar khawtlang hruaitute nen an inbiak hnuin hemi zan dar 8 ve hian chhuah an ni.

Sipai Intelligence Report-in a sawi danin Laltlanhlua leh Eliza te hi CDF-Hualngoram kuta an awm lai hian an lu ziahkawlh sak an ni a, Sikret nungin an lu leh taksa hmun dangah an dep a, chubakah pakhat zawk hi a ha hmai an thlawnsak a. Zokhawthar khawtlang hotute chuan an lu ziah kawlhsak an nih thu hi chu a dik tih an sawi a. He thil thleng avang hian Zokhawthar leh a chheh velah boruak a tang hman hle a, chhuah an nih hnuah erawh chuan boruak sosang hi a dai zui leh mai nia thudawn a ni bawk.