Kum 2022-2023 ah Mizoram leibat tlingkhawm cheng vbc. 10,972 leh nuai 49-ah a pung chho

Kum 2021-22 Financial Year chhunga Mizoram leibat tlingkhawm cheng vbc. 10,570 leh nuai 93 chu kum 2022-23 khan cheng vbc. 10,972 leh nuai 49-ah a pung chho.

 Mizoram Principal Accountant General in kum 2022-2023 chhunga Mizoram sum dinhmun an endikna atanga an hmuhchhuah dan tunhnai a tarlan a nih danin, Mizoram leiba (outstanding liability) hi a pung zawngin a kal a. Kum 2022-23 chhunga Mizoram sum thawhchhuah atanga chhuta za zela 3.37 chu sum indaihlohna a ni a. Sum thawhchhuah atanga chhuta leiba awm hi za zela 33.42 zet a nih avangin Mizoram Fiscal Responsibility and Budget Management (MZFRBM) Act danin a phut chu a pha thei lo a ni. Hemi hun chhung vek hian hmasawnna hna 291 thawhna atan cheng vbc. 2,552.59 hman a ni chungin hna hi Department hrang hrangin an thawk zo thei lova. Hemi avang hian hmasawnna hna thawhte hi hman tangkai a ni thei lova. Zawh hun tur bituk anga thawh zawh loh hi kum 1 atanga kum 5 te a ni hlawm a. PHE, Power leh PWD-in hna an thawh zawh loh avanga sum sen belh ringawt pawh cheng vbc. 87.19 a tling a ni.

Kum 2022-23 chhung khan chhiatrupna thleng thin pualin sawrkar laipui atangin State Disaster Response Fund (SDRF) hnuaiah Mizoram sawrkar chuan cheng vbc. 39.20 a dawng a, Mizoram sawrkarin a dolet vena tur chu cheng vbc.4.36 a ni a. Mahse, heta sum ruahman a vaiin cheng vbc. 43.56 hi SDRF-ah Mizoram sawrkar chuan a chhunglut ta lo a ni.

Mizoram sum thawhchhuah hi kum 2022-23 khan za zela 17.99 in a pung a. Chutih lai chuan Agriculture lama punna chu kum 2018-19 a za zela 12.35 a nih laiin kum 2022-23 ah chuan za zela 6.89-ah a tla thla thung a, Industry lam pawh pung lovin a tlahniam a ni. Mizoram sum dinhmuna thil lawmawm lam ve thung erawh chu State-in a thawhchhuah ve, State’s Own Tax Revenue chu cheng vbc. 247.88 a ni a, kum hmasa lam aia a punna hi za zela 29.2 zet a ni a. Non-Tax Revenue pawh cheng vbc. 405.65 niin kum hmasa aiin za zela 65.20 in a pung a ni. 

Kum 2022-23-ah khan hmasawnna lam atana hman tur ni lo, sawrkar inrelbawlna leh hlawh ilo atan cheng vbc. 10,092.39 hman a ni a. Budget-a sum ruahman zawng zawng cheng vbc. 11,416.22 atanga chhutin za zela 88.40 zet a ni a. Hmasawnna hna thawhna atana sum ruahman chu za zela 11. 6 chauh a ni. Kum 2023 March ni 31 khan Mizoram sawrkara Drawing and Disbursing Officer (DDO) 1,170 zinga 273-te chuan Savings leh Current Bank account-ah cheng vbc. 262.56 an dah tih hmuhchhuah a ni bawk.