ASF hri leng in ziaawm lam a pan hret hret zel

Serchhip District-ah nimin khan African Swine Fever (ASF) vanga Vawk thi tlem leh hretin 8 a thi a, Vawk 14 suat a ni bawk.
AH & Vety Department in an chhinchhiah danin nimin-a ASF vanga Serchhip District-a vawk thi chhinchhiah te hi Baktawng-ah 3, Chhiahtlang-ah 2 leh Then-zawl, Serchhip Vengchung leh Serchhip Dinthar Veng-ah pakhat theuh an ni a, hun engemaw chen hnua ni khat-a Vawk thi chhinchhiah 10 aia an tlem lehna a ni. Nimin vek khan Serchhip District-ah ASF vanga Vawk suat 14 a awm bawk a, heng zinga 11 te chu New Serchhip North-ah niin Serchhip Dinthar Veng-ah 2 leh Chhiah-tlang-ah pakhat te an ni.

Heti hian Serchhip District-ah kumin chhunga ASF vanga Vawk thi chu 3187 niin nimin thleng khan Vawk 6399 suat a ni tawh bawk a, kumin hian khaw 31-a chhungkaw 1980 ten ASF hri leng hi an tuar tawh a ni. He hri leng mek hi tun dinhmun ah chuan a ziaawm hret hret niin a lang a, khaw dang-ah hri kaina hi awm belh lutuk lovin ni khat-a Vawk thi leh suat chhinchhiah pawh a tlahniam hret hret a, hmun thenkhat ah chuan Vawk talh pawh an awm leh tan tawh a ni.