Vairengte Sabual mual-a Assam Police te kawng laih Assam sawrkar tihtawp tir nghal a ni - Home Minister

Zonuna Kawlni (LENKAWL) • August 1, 2024 • Comments • Mizoram

Home Minister K. Sapdanga chuan tunhnaia Vairengte Sabual mual-a Assam Police ten kawng an laih chu Assam sawrkar tih tawp tir nghal a nih thu a sawi a.  MZP General Hqrs. hruaitute chuan nimin khan helai hmun hi tlawhin State pahnih aiawhte inbiakna a awm leh hma chu hnathawh titawp rih tura hmala turin thuneitute an ngen a ni.

Doordarshan Palai in nimin-a  Home Minister a kawmna ah Home Minister K. Sapdanga chuan tunhnaia Vairengte leh Assam ramri ah chet tharna awm nia lang chungchang sawifiahin, June thla ruahtui tla nasa vanga Assam Police Border Post kawng min an siam that thu a sawi a, kawng an siam that rual hian hmun thenkhatah kawng an laih belh tih sawiin, Vairengte SDO(C) leh SDPO te a hmunah tirin thil awmdan enfiah a nih thu a sawi a, an thil hmuh Report chu Kolasib DC-ah thehluh niin Cachar DC biakpawh nghal a nih thu leh heng an chetna te hi tawpsan nghal tura an inbiak angin tunah hian tawpsan nghal a nih thu Home Minister chuan a sawi a ni.

Home Minister K. Sapdanga chuan State pahnih Chief Minister te lo inbiak tawhna angin thla thar mai ah hian ramri chungchang titi hona Aizawl-ah neih a ni dawn tih sawiin, tunhnaia thil thleng mek chu DC leh DC indawrna Level-ah kutthlak a tawk rih nia an hriat thu a sawi a ni. 

Hetihlai hian Mizo Zirlai Pawl (MZP) chuan nimin khan Assam leh Mizoram ramri, Assam-in hmathar an lakna hmun Aitlang, Vairengte chu tlawhin tunhnaia Social Media a video rawn darha Assam Police in an Camp panna kawng motor luh theih nana Samuela huan bul an laih leh Chhandama huan-a Assam Police in Camp an rawn nei nia langte chu a hmun ah kalin an enfiah nghal a. Mizoram lamin an Camp, 3rd Battalion MAP awm mekna piah lama kawng an laih mek chu ruah a sur avanga an chawlh rih thu zawhfiah niin Assam Police lam in an kawng rawn sial chu August 9, 2024 a Assam leh Mizoram sawrkar inbiakna awm leh hma chu hnathawh hi titawp rih tura hmala turin thuneitute an ngen tih an sawi a ni.

MZP General Hqrs. hruaitute hian nimin vek khan Joint YMA Vairengte leh Joint VC hruaitute Joint Meeting neih puiiin ralkhat atanga thlir ringawt lo a khawtlang hruaitute atang ngei a thil chiang zawk hriat an tum thu an sawi a. Vairengte khawtlang hruaitute chuan an Camp panna kawng motor tlan theihna tura blacktop emaw, block phah a nih ve loh thu leh awlsam taka kal zung zung theih ala nilo chu MZP hruaitute hnenah hian Sawrkar chak zawka nawr turin an lo ngen a ni.