Uchuak taka invulh ah MNF in sawrkar an puh

MNF Party chuan ZPM Sawrkar chu uchuak taka mahni leh party mite vulh chunga Zoram mipuite hrek mektu ah an puh.

Nimin-a Aizawl Press Club-a thuthar thehdarhtute an kawmna ah MNF Media & Publicity General Secretary VL. Krosshnehzova chuan ZPM sawrkar in anmahni an invulh dan sawiin, ZPM Sawrkar chu thla sarih chhung an sawrkar hnuah inrenchem leh sawrkar sawhnghet zawnga hmalak intiam chung si a, an intiam lo ang hlira an kal avangin Zoram mipuite an vanduai hle niin a sawi a ni.

MNF Media & Publicity hruaitute chuan ZPM sawrkar chu an party mi te Mizoram sawrkar a dinhmun pawimawh hrang hranga tul lo taka hna chelh tirah puhin, Mizoram sawrkarin a hlawh a pek thenkhatte hlawh pawh nasa taka an pun thu an sawi a, MLA mahni In a chengte chauh in an dawn thin House Furnishing pawh MLA zawng zawngten an MLA term kum khatnaah cheng nuai 2 leh kum dang zelah Rs. 50,000 an dawn tawh dawn thu te, MLA te tan Housing Loan pawh cheng nuai 20 atangin cheng nuai 30 ah an tihpun tur thu an sawi a, MLA te lirthei leina loan tihtawp tak pawh ZPM sawrkar chuan an tihnun thar leh bakah a hma lama nuai 4 ni thin chu nuai 15-a an tihpun thu an sawi a ni.

MNF Media & Publicity hruaitute chuan MLA Fund chu cheng nuai 150 atangin cheng nuai 200 a tihpun a nih thu an sawi bawk a, MLA PA te hlawh pawh ZPM Sawrkar chuan Rs. 20,000/- atangin Rs. 35,000/- ah an tipung a, AMC-a Mayor hlawh chu Rs. 31,000/- atanga Rs. 65,000/- a tihpun a nih thu leh Lunglei Municipal Corporation-a Chairman hlawh pawh Rs. 27,500/- atanga Rs. 62,000/- a tihpun thu sawiin, sawrkar tharin suma sen belhna tur a siam zawng zawngte chu kum nga chhunga cheng nuai 13,415.84 a nih tur thu an sawi a ni.