Serchhip-ah Ram zalenna ni champha LAD Minister hovin hman a ni

Ram Zalenna Ni, India Independence Day vawi 78-na chu nimin khan ramchhung hmundang te rualin Serchhip-ah pawh hman a ni a, LAD Minister C. Lalsawivunga chuan India Hnam Puanzar pawtparhin Parade Chibai buk a chhanglet a, mipuite hnenah thuchah a sawi nghal bawk a ni.

Serchhip Sports Complex-a India Independence Day lawmna ah hian LAD Minister chuan Serchhip District mipui zawng zawngte chibai bukin, India Independence Day lawmtute duhsakna a hlan a. “India ram khua leh tui ten zalenna kan lo neih theihna tura an theihna zawng zawng hlantute kan hre reng a, zahna chibai kan buk a ni,” a ti a. Serchhip chu District changkang leh entawntlak, India ram pumah za zela teha District zawng zawng zinga ziak leh chhiar thiam tamna ber, ramlai malsawmna dawngtu a nih thu sawiin, “Hmasawnna pawh chak takin a kal mek zel a, hmachhawp tam tak a la awm chho zel dawn,” a ti a. Chutih mek laiin kan ram leh hnam hmasawnna turin mawhphurhna lian tak mi tinte koah a innghat tih hre reng tur leh kan ram tana tih theih kan neih apiang thahnemngai taka hlenchhuak tura inhlan thar turin mipui te a sawm a ni.

A enkawl Department-a Sawrkar hmalakna hrang hrangte tarlangin, Village Council Act 1953 Amendment-na tur buaipui niin Consultation Meeting neih a nih tawh thu leh VC dan thar tha tak kan neih theih nan Consultation Meeting pawh koh leh thuai tum a nih thu a sawi a, Village Council tinah Panchayat Bhavan sa vek tura ruahmanna siam niin RGSA Scheme hnuaiah Village Council te hman tur Computer Set 86 chu tun August thla chhung hian VC 86 te hnenah pek an nih thu leh 15th Finance Commision Grant pawh chak taka kalpui mek a ni tih a sawi a. AH&Vety Department hnuaiah Artui, Ar leh Sa a ram intodelh turin hma an la thar mek a, ranchaw a intodelh tura hmalakna thar neiin Thenzawl Vety ramah Fodder Plant chin mekna bakah kumin chhungin Tin 72-a zauah hma thar lak a ni a, Vaimim leh Bekang a intodelh turin hmalakna kalpui tum mek a ni bawk, tih a sawi a. “ASF avangin Vawk vulhtuten an tuar nasa hle tih sawrkarin a hria a, kan Chief Minister zahawm tak hmalaknain Central lamah Rehabilitation dil mek a ni a, State of Calamity a puang tura hmalak mek a ni,” a ti bawk.

Serchhip District mipuite mamawhna hriaa sawrkarin Serchhip District Hospital khum 100 awm theihna tur, a tira duan aia changtlung zawka sak dan tur ruahmanna a siam te leh building hlui thiah zawhfel a ni ta te chu lawmawm a tih thu LAD Minister chuan a sawi a. Hriselna kawngah District-in hma a sawn theih nan Medical Officer leh Health Worker te dah belh an nih thu leh Paediatric ICU hawn a ni ta te chu hriselna kawnga District hmasawnna lawm-awm tak a nih thu a sawi a ni.

Sawrkar Department hrang hrang ten Serchhip District hmasawnna atana hna an thawh dan te leh an hmachhawp te pawh Minister chuan tarlangin, Kut hnathawktuten hmasawnna rahbi thar an kai theihna tura sawrkar hmalakna pawimawh tak Bana Kaih – Hand Holding Policy hnuaia sawrkar ruahmanna te a sawi a. Serchhip District chhungah Mizoram Chief Minister, Serchhip bialtu MLA ni bawk kaihhruaina in hmasawnna hna hrang hrang thawh mek a nih thu te a sawi bawk.

Minister C. Lalsawivunga chuan Agriculture Department chuan Hand Holding Policy hnuaiah hian Farmer Producer Organization din turin hma a la mek thu leh WRC area 2392.07 Ha a zauah FPO hi din turin ruahmanna siam a ni tih a sawi a, RKVY-RAFTAAR hnuaiah thlai vawnthatna, Solar Cold Storage chu loneituten tangkai taka an hman theih turin Agriculture Complex-ah bunfel a nih thu leh Custom Hiring Centre pawh Unit 9-ah Tractor pekchhuah a ni tih a sawi bawk.