Naupang venhimna chungchanga thawhhona tha zawk a awm theih nan Serchhip-ah thukhawm
Sawrkarin naupang himna a ngaihpawimawh avangin humsual an dai lohna tur leh thil tha lo an chunga a thlen lohna turin dan chi hrang hrang a duang a, anmahni venhimna ngaihtuahtu Department te leh khawtlang mipui aiawh mi langsar te telna Committee dinin heng Department peng hrang hrangte leh mipui mimirin thawhhona tha zawk an neih theihna tur te, vantlang mipui ten naupangte dikna chanvo humhim a pawimawhzia leh an laka pawi khawihtute chunga hremna lek kawh a nih theih dan zau zawka an hriat theih nan thutkhawm hi neih a ni a. He hun hi Serchhip Addl. SP Saidingliana Sailo chuan kaihruaiin Juvenile Justice Board (JJB) te, Child Welfare Committee (CWC) te, Special Juvenille Police Unit (SJPU) te leh District Child Protection Unit (DCPU)-a thawktute te an tel a ni.
Juvenile Justice (Care and Protection of Children) Act hnuaiah hian naupang thilsual ti a puh emaw, enkawl leh venhim ngai buaipuitu Police te hi Uniform hak a rem ti lo a, Kutkawl (handcuff) bun tir phal a nih loh bakah Jail-ah emaw Thana-ah zan riah tir phal an ni lo bawk a. Naupang te tan bika din Special Juvenille Police Unit (SJPU) chu District tinah dah a ni a, naupang pawikhawih buaipui ngai leh venhim ngai te chu heng SJPU a tel te chauh hian an khawih thei a ni. Naupang kum 18 hnuai lam thilsual ti leh pawikhawih te chungchang bik hi Court puitling ah ngaihtuah a ni ngai lo a, Juvenile Justice Board (JJB) te kutah dah a ni thung a. Child Welfare Committee (CWC) te hian naupang kum 18 hnuai lam enkawl leh venhim ngai bikte chungchang an ngaihtuah thin a ni.
Nikum August thla atanga kumin July thla tawp thleng khan Serchhip District-a Child Welfare Committee (CWC) chuan naupang enkawl leh venhim ngai case 180 a ngaihtuah a, Juvenile Justice Board (JJB) ten naupang dan kalh a che te chungchang case 21 a buaipui bawk a ni. Serchhip District chhungah hian naupang enkawl leh venhim ngai te awmna Children's Home pahnih- Zoar Urban Deprived Children's Home leh Unity Orphanage Home te awmin naupang 18 enkawl mek an ni a. Naupang dan kalh a che te awmna Observation Home-ah naupang enkawl lai 2 an awm mek bawk a. District Child Protection Unit hnuaiah kumin chhungin naupang 125 te hnenah Sponsorship thlatin Rs. 4000/- pek an ni bawk.