Manipur-a buaina a thlen hnuah Mizoram kaltlangin buhfai quintal 179889.18930 tawnluh a ni tawh

Manipur tualchhung buaina thlen hnuah Food Corporation of India (FCI) Aizawl kaltlangin Manipur-a Zofate chenna lam Churachandpur District-ah buhfai quintal 179889.18930 thawn a ni tawh a. FCI hian buhfai ‘stock’ a neih that deuh avangin Open Market Sale Scheme-D hmangin kartin buhfai an zuar tan ta bawk.

Zawhna chhangin FCI Divisional Office hotute chuan, June 17, 2023 atang khan Manipur Churachandpur District tana FCI-a buhfai allot hi Aizawl Division lam hian an kutken tan a; Bairabi Rel Station-ah tho rawn thlenpui niin, heta tang hian Truck hmangin Mizoram kaltlanga phurhchhoh a ni tih an sawi. Buhfai pek chhoh hi anmahni quota hrim hrim niin, Mizoram chan tur (quota) lak hek a awm lova, a hmaa FCI Imphal kaltlanga an hmuh thin kha, tualchhung buaina avangin Imphal atang chuan by road-a kalpui a remchang rih tawh lova, Silchar atangin Bairabi-ah an rawn phur a, helamah anni’n an lo kutken zui mai tih an sawi a ni.

Manipur panna kawng, Mizoram chhung hmun thenkhatah a chhiat avangin driver-ten zawh ngam loh an nei a; sawrkarin a remchan anga a siam bakah Carrying contractor-ten thawhkhawmin kawng siamna atan hman a ni thin tih FCI Aizawl hotute hian an sawi a. An ni pawhin State PWD lamah an nawrpui a, Fur zualpui a reh hi chuan kawng hi siam an tum dawn nia an hriat thu an sawi a. Bairabi Rel Station atanga truck hmanga buhfai phurhchhuahnaah kawng chhe lai siamthat kawngah Supply Minister-in chak taka a bawhzui sak thu an sawi bawk.

Food Corporation of India hian buhfai ‘stock’ a neih that deuh avangin Open Market Sale Scheme (OMSS) - D hmangin kartin buhfai a zuar thin dawn a, a hmasa ber atan tun thla ni 7 khan zuarin a hlawma buhfai la duh, registration neite tan MJunction portal atangin e-auction hmanga lei theih a ni.

Buhfai hi quintal khatah Rs.2800 niin Fortified Rice a nih chuan Rs.73 belh tur a ni a, FCI buhfai hi Fortified Rice vek a nih tawh avangin Rs.73 hi belh tel nghal zel a ngai a. Mizoram-ah chuan FCI kudam – Aizawl (Tanhril), Kolasib leh Bairabi kudam atangin mahni remchanna ami ber a lei theih dawn a, an lei tur zat erawh a tlem berah metric ton khat (1) a ngai dawn thung a ni.