Mizoram Trade Expo nei

Zorun Events in an buatsaih ‘1st International Mizoram Trade Expo’ chu Inrinni khan Champhai Kahrawt-a Vanlallawma Indoor Stadium (VANIS)-ah neih niin Champhai Addl. DC K. Zorammuana chuan a hawng a, Trade Expo chu sumdawnna kawnga ngaihtuahna thar min petu, Mizo sumdawngte leh hnamdangte inkara inlai-chinna tha siamtu ni se a duh thu sawiin, Mizoram awmna chu hmun pawimawh tak, Myanmar leh Bangladesh ramri ten an hual vel a nih thu a sawi a. Kaladan Multi-Modal Transport Transit Project (KMMTP) a puitlin hunah phei chuan khaw-mual leh tuipui kaltlangin Asia chhimchhak ram te leh Bangladesh tan India ram kawtchhuah a la ni thuai dawn a, he hun atan hian tun atanga inpuahchahna kalpui a ngai tih a sawi bawk.

1st International Mizoram Trade Expo hi tun thla ni 24 thleng khian neih a ni dawn a, ramchhung leh rampawn atangin sumdawng engemaw zat an fuan khawm a, chawhma dar 10:00 atanga zan dar 08:00 thleng mipuite tlawh theiha hawn thin a ni ang.