Maxi Cab Service la din tum

Tlabung Maxi Cab Welfare chuan Lunglei leh Tlabung inkar kawng siam mekah lungawina an hmuh loh avangin service lova din chhunzawm zel an tum tih an sawi. Tlabung Maxi Cab Welfare hian NHIDCL enkawl National Highway 302 chu tun dinhmunah zawh ngam chi-a an ngaih rih loh avangin Tlabung leh Lunglei inkara Maxi Cab service-te chu August 13, 2024 (Thawh-lehni) atang khan an service titawpin an lo ding tan tawh a, Zirtawpni-a kawng dinhmun an enfiah hnuah lungawina tur an hmuh loh avangin din zui zel an tum ta a ni. Tlabung mai bakah Lungsen leh Bunghmun tiamin khaw hrang hranga Maxi Cab-te pawhin Vawiin, Thawhtanni atang hian an service titawpa din an tum nia thudawn a ni.