Japan-a kal tura thlan te vailiam an ni

Geriatric Caregiver RIPANS hnuaia Training chhuak mi 8 te chu Japan ramah kum upa te enkawl hna thawk turin thlan an ni a, heng mite hi niminpiah tlai khan Social Welfare Minister Lalrinpuii chuan a Pisa atangin a vailiam a ni.

Social Welfare & Tribal Affairs, Women & Child Development Minister Pisa-a heng mi 8 te vailiamna hunah hian Minister Lalrimpuii chuan damdawi lama thiamna sang zelah mihringte kan dam rei chhoh zel rualin, kum lama upate chu bawrhsawmnain a tlakbuak sam bik hle tih a sawi a, “Hei hi hriain Sawrkar laipui Ministry of Social Justice & Empowerment chuan Scheme thar, Creation of pool of trained Geriatric Caregivers programme chu a rawn duang a ni,” a ti a. Tute pawh hian upat hun kan la neih theuh dawn avangin mahni chantur anga dah chung zelin upate, nu leh pa, pi leh pute duat tak leh hmangaih taka enkawl turin thalaite chu a chah nghal a ni.

Geriatric Caregivers (kum upa enkawltute) training hi Ministry of Social Justice & Empowerment hnuaia Scheme, Atal Vayo Abhyuday Yojana (AVYAY) Scheme hnuaia kalpui a ni a. Social Welfare and Tribal Affairs chu Nodal Agency niin RIPANS hi Training Centre a ni a. He Short Term Course hi thla 3 chhung neih niin heng mi 8-te hi National Skill Development Corporation (NSDC) hmalakna a kal tur an ni a, Screening an paltlang hnuah Japan lama Client/Employer (anmahni ruaitu turte) interview an paltlang leh anga, Delhi-ah Japanese Language Course thla 9 chhung zir lehin chumi hnuah Japan lama tirh chhuah an ni ang.

RIPANS hian 1st batch-te chu train chhuak tawhin, anni hian Mizoram Geriartric Caregivers Association an din tawh a, a mamawh tan koh theih rengin an awm a ni. Hei bakah hian 2nd Batch hi ni August ni 12, 2024 khan Class an tan pui a, Seat tlem a la awm avangin dilna hun an hawng mek a, dil duhte chuan Directorate of Social Welfare & Tribal Affairs, Chaltlang-ah dilna thehluh theih a ni.