Hnam Puanzar zar theuh turin mipuite sawm

India ram zalenna champha vawi 77-na lo thleng tur lawmna puala Zalenna kawngzawh-a tel tur leh In tina hnam puanzar zar turin Art & Culture Department chuan Mizoram mipuite a sawm.

Art & Culture Department Secretary Florence Zotluangpuii chuan Hnam puanzar chu Art & Culture Office-ah leh hmun hrang hrangah lei theih tura chhawpchhuah a ni dawn tih sawiin, District khawpui hrang hrangah DC te kaihhruaiin zalenna kawngzawh huaihawt tura ruahman a nih thu leh zalenna hlutzia leh ropuizia lantir nan chhungtinin Hnam puanzar chu zar vek tur leh Sawrkar in hemi puala hun a buatsaihah tawiawm theuh turin mitin an sawm tih a sawi bawk.

Art & Culture Secretary sawi danin zalenna puala Hnam puanzar nena kawngzawh hi August ni 12-ah neih a ni dawn a, hetah hian zirlai naupang leh mipuiten Aizawl Chanmari leh Sikulpuikawn inkarah kawng zawhin Vanapa Hall kawt-ah an intawk dawn a; hetah hian zalenna thutiam lak a ni dawn a, a tuk August ni 13-ah mipui a duh apiang te chhim theih turin ‘Tiranga Concert’ chu Vanapa Hall-ah neih tur niin sawrkar pisa leh hmun pawimawhah Hnam Puanzar pawimawhna phochhuah a ni dawn a; hetah hian mipuiten thu an ziah theih tura ruahman niin he thuziak hi August ni 15 Independence Day lawmna pui ber New Delhi-ah tarchhuah tur a ni ang. Kum 2022 atang khan Azadi Ka Amrit Mahotsav hnuaiah ‘Har Ghar Tiranga’ hi bul tan a ni a, nikum khan mi vbc. 10 chuangin Hnam puanzar thla an lakpui hi Internet-ah an pholang a ni.