ASF vanga Vawk thi 1900 tling

Serchhip District-ah nimin khan ASF vanga Vawk thi 56 zet chhinchhiah thar leh niin Vawk 140 zet suat leh a ni bawk a, Serchhip District-ah  Vawk 1901 a thi tawh a ni.

Serchhip-a AH& Vety Department ten an chhinchhiah danin nimin a ASF vanga Vawk thi chhinchhiah 56 zinga 40 te hi Thenzawl khuaa mi te an ni a, Serchhip P&E Veng-ah 8, Serchhip Kawnpui-ah 4 leh North Vanlaiphai-ah Vawk pahnih ve ve thi bawkin Chhiahtlang leh Lungchhuan khua ah Vawk pakhat ve ve a thi bawk. Nimin vek khan Veng leh khua 14-ah Vawk 140 zet suat leh a ni bawk a, heng zinga 44 te chu Serchhip Kawnpui Area-ah niin New Serchhip South-ah 28, Chhuanthar Tlang-nuam-ah 16 leh East Lungdar-ah 14 suat a ni.

Heti hian kumin chhungin Serchhip District-ah nimin thleng khan ASF vanga Vawk thi chu 1901 a tling ta a, Vawk 4881 suat ni tawhin khaw mal-a Vawk thi tamna ber Thenzawl-ah 565 a thi tawh a, North Vanlaiphai-ah 308 thi tawh bawkin Baktawng-ah 125 a thi tawh bawk a. Serchhip Town chhungah Vawk 445 zet a thi tawh bawk a ni.