Zirlaibu dawn tur la dawn kim loh chungchang ah sawrkar in theihtawp chhuahin hma a la mek

Samagra Shiksha hnuaia zirlai naupangten a thlawna zirlaibu an dawn tur ang an la dawn kim loh chungchang ah sawrkar-in theihtawp a chhuah mek tih School Education Minister Dr. Vanlalthlana chuan sawiin, mamawhna sang thut avanga he harsatna hi thleng a nih thu a sawi bawk.

Zirlai ten Zirlaibu an la dawn kim loh chungchanga nimin-a thuthar lakhawmtute a kawmna ah School Education Minister Dr. Vanlalthlana chuan Zirlaibu indaihlohna avanga School-a Zirtirtu leh Zirlai ten harsatna an tawk chu pawi an tih thu sawiin, he harsatna thleng hi hriat lawk loh mamawhna sang thut vang a ni tih a sawi a. Education Minister chuan Zirlaibu mamawh tur zat reng reng kum hmasa lam atanga zirchian hmasak niin tuna Zirlaibu mamawh tur zat pawh hi sawrkar liamta in a zir lawkna atangin 9,52,111 ni tura chhut a nih thu leh nikum lama Zirlaibu zuartu ten an hralh zawh loh 4,56,081 a la awm avangin chhut thar tura ruahman chu 4,56,030 a ni tih a sawi a. Hei hi April thla khan chhut fel vek niin School tina sem tura chhawp hman vek a nih thu a sawi a. Print tlai vang emaw, hmalak tlai vang emaw a ni lo tih a sawi a ni.

School Education Minister chuan sawrkar in Zirlaibu a chhut atanga zaa 70 chu Department chan tura ruahman niin a bak zaa 30 chu a zuarchhawngtu te chan tur a ni thung tih pawh a sawi a, a zuarchhawngtu ten an indaihloh thu an sawi avangin sawrkar chu tlawmngai zawkah tangin zaa 64 chauh an chan thu leh hei vang hian lehkhabu hi an indaihloh phah ta tih a sawi a. Hei bakah hian tunhmaa sawrkar in lehkhabu a chhut lei ngai lo Autonomous District Council leh Manipur-a Zohnahthlak thenkhat in an lei ve avangin indaih-lohna hi a nasat phah tih a sawi bawk.

He harsatna hi sukiang tura hmalak mek a nih thu School Education Minister Dr. Vanlalthlana chuan sawi bawkin Finance Department in sum an tihfel hun hunah Zirlaibu hi siam belh nghal a ni dawn tih a sawi a. Hemi atan hian Printing & Stationery Department te pawh an inring reng tawh tih sawiin, lehkhabu chhut tur hi a hmaa mi ang tho, Soft copy awm sa a nih avangin zirlaibu hi an neih theih thuai an beisei thu a sawi a ni.