Vety Minister in Serchhip tlawh

AH&Vety Department changtu Minister C. Lalsawivunga chuan nimin khan Thenzawl-a Sial Farm tlawhin Serchhip-ah DVO Office pawh a tlawh nghal bawk.

AH&Vety Minister hian nimin khan chhimlam atanga Aizawl panin Hnahthial a AH & Vety Department Office a tlawh hnuah Serchhip-a District AH&Vety Office leh Thenzawl a Mithun Stud Farm te a tlawh a, Serchhip-ah hian DVO Dr. H. Vanlalrawna chuan lo dawng-sawngin Office hmunhma te a tlawh bawk a ni.

AH&Vety Minister chuan an Department chu mipui nena inhne reng leh Department pawi-mawh tak a nih avangin a thawktute pawh an inthlahdah thiang lo tih a sawi a. “Mipuite mamawhna ah keini chuan a hmunah kalchilhin an harsatna te kan zirchianpui thin a, kan theihtawp kan chhuah a, kan beingawrh hle a ni,” a ti. Sa thianghlim leh tuihnai hnianghnar taka mipuite hnena chhawpchhuah a pawimawh thu pawh Minister hian sawiin, Mizote chu ranvulh uar tak kan nih thu a sawi a, chutihrual chuan ranvulh kawngah tan kan lak a ngaih thu leh a chaw siam kawngah te pawh State dang atanga lakluh ngai lova kan ramchhung ngei atanga ranchawa intodelh dan kan ngaihtuah a tul thu a sawi bawk a ni.