Vaivakawn - Zohnuai lei tlahniam a hmunah tlawh

Aizawl Vaivakawn atanga Zohnuai panna kawng lei tlahniam avanga harsatna thleng chu nimin khan Minister ten a hmunah tlawhin an enfiah.

Vaivakawn - Zohnuai lei tlahniam hi PHE Minister Prof. Lalnilawma leh Sports Minister Lalnghinglova Hmar bakah Deputy Govt. Chief Whip W. Chhuanawma te chuan tlawhin harsatna tawk chhungkua te nen an inkawm bawk a. Khawtlang hruaitute tarlan danin kum 2017-a Hunthar leh Rangvamual inkar kawng min atangin Vaivakawn - Zohnuai kawng hi a tlahniam tan a. Kumin July khan kawng hi tlahniam zual lehin tun thleng hian chhungkaw 35 bawr vel chuan an chenna In an chhuahsan tawh a ni. Vaivakawn Zohnuai kawng a tui luan kawr te chu thawmthat thuai a ngaih thu te leh Luangmual, Chhangurkawn panna kawng a in thenkhat tan pawh a hlauhthawnawm theih thu an sawi a ni.

PHE Minister Prof. Lalnilawma chuan Vaivakawn - Zohnuai kawng tlahniam avanga chhungkaw engemaw zatin harsatna an tawk chu pawi a tih thu sawiin, chhiatna nasa zawk a thlen loh nan mithiam rawn chung a ruahmanna siam a nih tur thu a sawi a. Sports & Youth Services Minister Lalnghinglova Hmar chuan chhawmdawl leh thawmthat hna thawhna turin Aizawl District Disaster Management Authority, Public Works Department leh Public Health Engineering hotute hnen ah harsatna chungchang thlen a nih tawh thu a sawi bawk a ni.