Mumbai-a Mizoram House satu sawrkar in thlak a tum

Kum 2013 atanga Navi Mumbai-a Mizoram State Guest House & Emporium sak hna chu tun thlenga zawh ala nih loh avangin a satu tur a thara ngaihtuah a ni dawn.

Chief Minister Lalduhoma chuan niminpiah khan Mumbai-a Mizoram House chu tlawhin Navi Mumbai-a kum 2013 a sak tan tawh, tun thlenga la zawh loh Mumbai Mizoram State Guest House & Emporium satu tur a thara ngaihtuah a nih tur thu a sawi a. September 2, 2008 khan City and Industrial Development Corporation of Maharashtra (CIDCO) chuan Plot No. 9, Sector 30A Vashi (Navi Mumbai) hi Mizoram sawrkar a pe a. A Lease period hi kum 90 niin a ram zau zawng hi 1983.48 Square Metre a ni. Developer/Builder te nena hma laa kalpui phawt turin Mizoram sawrkarin ruahmanna a siam a. Builder Company pakhat US Roofs Ltd. nen ni 30.1.2009-ah Agreement sign in US Roofs te hian Full Premium cheng vbc. 3.8 chu Managing Director, CIDCO-ah Mizoram sawrkar hmingin an pe a. March 9, 2010-ah Mizoram sawrkar leh CIDCO hian Agreement zign in Agreement ang chuan Mizoram sawrkar in he plot hi State Guest House & Emporium atan a hmang ang a, thil dangah a hman phal a ni lo a. Agreement sign atanga kum 5 chhungin a sa zoin a luah fel tur a ni. Hemi hun chhunga a sa zo hman lo a nih chuan Additional premium pek belhin a sa chhunzawm thei a ni.

Mizoram sawrkar hian US Roofs nen Agreement a siam hmasak ah khan Building chhunga Mizoram chan (space) a zim lutuk nia a hriat avangin Development Agreement (Revised) chu June 2, 2011 khan a sign pui leh a. He Agreement ang hian Mizoram sawrkar in space a chan tur chu 9500 Sq. Ft a ni a. Hei hi a ratio chuan 25:75 a ni a. Builder lam hian 75% an chang anga, Retention period kum 75 neiin Builder lamin an chan 75% hi sumdawnna hmun (commercial use) atan a hman tura tih a ni.

March 1, 2013 khan khatih laia Mizoram Chief Minister chuan a lungphum phumin a sak hna pawh tan nghal a ni a, hemi kum hian Mizoram House an sak ang chiaha US Roof ten an sak Arunachal Bhawan chu CIDCO lamin objection an neih avangin Mizoram House sak kal lai pawh chu US Roof hian an chawlhsan lailawk a, kum 5 chhungin an zo hman ta lova. CIDCO hian US Roofs te hi kum 2 (9.3.2015 - 8.3.2017) extension fee pe turin a ti a, mahse an pe duh lova. Ni 08.03.2019 khan extension fee pea sak chhunzawm turin CIDCO hian a remtihsak nawn leh a, chu pawh chu US Roofs te hian an pe duh ta chuang lo a. Kum 2021-ah DRC Mumbai chuan Mizoram sawrkarin ti tura a tih angin CIDCO hnenah Building 75% lai US Roofs ten Commercial atana hman tumna awm mek hi an ngaihdan a zawt chiang a. Reminder te a thawnleh thin pawhin tun thlengin chhanna hmuh a ni ta rih lo a ni.

Chief Minister chuan hetianga US Roofs ten Mizoram sawrkar nena an inremna bawhchhiaa muang taka hma an lak avang hian Assembly Committee pawhin an zu tlawh tawh tih sawiin, Sawrkarah rawtna te pawh an thlen thu a sawi a. “Mumbaia cheng Mizote leh damlo zu kal te pawh an mangang thin hle a, kum telin Mumbai pantu kan pung zel si a. Chuvang chuan kan sawrkar chuan ngaihtuahna thar sengin Law & Judicial Department ten zirchianna te an neih hnuah US Roofs nena Agreement hi tihtawp a, tha thara a satu tur zawn ni se. CIDCO in min pek dan ang tak leh Mizo mipuiten hlawk zawka kan hman tangkai theih ngei tura sak ni se kan ti ta a ni,” a ti a. Agreement tihtawp tura thutlukna hi Mumbai a zin hmaa an siam a nih thu pawh a tarlang bawk a ni.