Two Wheeler Taxi Permit tam

Mizoram pumah Two Wheeler Taxi Permit 5256 zet pekchhuah a ni tawh.
Mipui leh bungraw phur motor permit pekchhuah kawnga thuneitu, Transport Department hnuaia awm State Transport Authority (STA) hian Aizawl khawpui tan bik Two Wheeler Taxi permit 3646 a pechhuak tawh a, hei bakah hian Lunglei tan 573 pe tawhin, Siaha-ah 94, Champhai-ah 275, Kolasib-ah 103, Serchhip-ah 169, Lawngtlai-ah 101, Mamit-ah 71, Khawzawl-ah 77, Saitual-ah 79, Hnahthial-ah 26 leh Thenzawl-ah 42 te a pe chhuak tawh bawk a ni. Hetihlai hian Mizoram pumah Two Wheeler hi a pung chak hle niin a lang a, June thla tawp thleng khan Mizoram-ah Two Wheeler hi 2,16,213 zet register a ni tawh a ni.

RTI hmanga zawhna chhangin Transport Department SPIO chuan January 1, 2024 atanga May 31, 2024 chhung khan Mizoram-ah lirthei 13,607 register a ni tih a sawi a, hemi hun chhunga DTO hrang hranga lirthei register zat chu Aizawl-ah 9,578, Lunglei-ah 1,221, Siaha-ah 291, Cham-phai-ah 734, Kolasib-ah 665, Serchhip-ah 375, Lawngtlai-ah 503 leh Mamit-ah 240 te a ni a. Heng lirthei register zingah hian Two Wheeler tam berin 9,341 ziahluh a ni a, motor Car 2,049 leh Goods carrier 942 ten an dawt a. January 1, 2024 atanga May 31, 2024 chhung khan Mizoram sawrkarin lirthei chhiah chi hrang hrang (MV Tax) atangin sum Rs. 8,07,71,857.00 a hmu bawk.