Thapui thawha Mizoram Health Care System siamthat a ngai - Health Minister

Zonuna Kawlni (LENKAWL) • July 13, 2024 • Comments • Mizoram

Health Minister Lalrinpuii chuan Mizoram Health Care System chu thapui thawha siamthat a ngai tak meuh niin a sawi.

Health Minister hian nimin khan Lawngtlai khawpui chhunga Damdawi In Pathum - District Hospital, Lairam Christian Medical Centre & Hospital (LCMC&H) leh Christian Hospital Lawngtlai te a tlawh a, District Hospital a tlawhna ah hian Damdawi In-a thawkte chu hna ropui tak thawk, mipuite innghahna lian tak an nihna hre reng tur leh chumi rilru pu a thahnemngai taka thawk turin a chah a. Damlote chu an pawimawh ber a, a enkawltute pawhin khawngaih leh lainatna, zaidamna nen a enkawl a tul hle tih a sawi a. Mizoram Health Care System chu thapui thawha siamthat a ngai tak meuh tih sawiin, “Sawrkarin theihtawp a chhuah mek zel a ni,” a ti a. District Hospital Pharmacist la neilo te pe vek tura hmalak mek a nih thu a sawi bawk.

Health Minister chuan natna khirh bik enkawlna (Critical Care Unit) ang chi pawh nei ve thei ngei tura hmalak a tul hle tih sawiin, a bik takin Lung zai ngai (Heart Surgery) ah sawrkar damdawi In-ah sum tlem zawk senga zai theih thuai a beiseiawm niin a sawi a. Kidney transplant pawh tih theih thuai a ni dawn tih sawiin, In Vitro Fertilization (IVF) ti tura phailam pan reng ngai chu a veiawm thu leh Mizoram-ah ngei ti ve thei tura hmalak a tul thu a sawi a, reilote ah tih ve theih a beisawm hle niin a sawi bawk.

District Hospital zawng zawngte thuamthat a ngai hle tih Health Minister chuan sawiin, District Hospital Lawngtlai mamawh tam tak zingah 'CT Scan' leh 'Dialysis' khawl chu dah thuai a ni ang tih a sawi a. Universal Health Care Scheme kalpui turin sawrkarin hma a la mek zel tih pawh sawiin, “August thla tawp lamah chuan hman theih tura chhawpchhuah tum a ni,” a ti a. “Universal Health Care Scheme chu mi zawng zawng huap tura duan niin cheng nuai 5 thleng bill theih ani dawn a, Health Care Society ten an enkawl ang,” a ti a. Universal Health Care Scheme hlawhtlinna turin Kohhran damdawi in leh mimal damdawi In te an pawimawh hle tih pawh sawiin, Private Hospital-te nen indawr mek a ni a, Kohhran damdawi In te chuan tha taka tawiawm turin a ngen a ni.

Health Minister Lalrinpuii chuan National Health Mission (NHM) staff-te an pawimawhin an tangkai hle tih pawh sawiin, Mizoram Health Care System tha tichaktu an ni tak meuh tih a sawi a, thahnem ngai taka thawk zel turin a sawm bawk a ni.