Sawrkar tharin kuthnathawktute chawikan a ngaipawimawh ber - Agriculture Minister

Zonuna Kawlni (LENKAWL) • July 13, 2024 • Comments • Mizoram

Agriculture Minister PC. Vanlalruata chuan sawrkar tharin kuthnathawktute chawikan a ngaipawimawh ber niin a sawi.

Agriculture and Farmers Welfare Department Minister PC. Vanlalruata hian nimin khan Vaphai-ah Block Agriculture Officer (BAO) Office leh Animal Feed Processing Plant te a hawng a, hemi puala Inkhawm Vaphai Community Hall-a neih ah Agriculture Minister PC. Vanlalruata chuan BAO Office hawn a nih theih nana sulsutu sawrkar hmasa leh Official-te chungah lawmthu sawiin, “Sawrkar tharin kuthnathawktute chawikan a ngaipawimawh ber a, he mi tihlawhtling tur hian sawrkar kalphung (policy) pawh kan duang,” a ti a. Kuthnathawktu ten awlsam zawka thlai thar an hralh theih nan thlai chi li - Sawhthing, Aieng, Hmunphiah leh Hmarcha te rate mumal tak sawrkarin a bithliah tawh tih sawiin, “Thlai dang pawh tih chhoh zel tum niin Chief Minister kaihhruaina hnuaiah Buhhum lei dan tur ngaihtuah mek a ni,” a ti bawk. 

Agriculture Minister PC. Vanlalruata chuan thlai rate mumal tak bakah kuthnathawktute tan Crop Insurance pawh tih chhoh tum a ni tih a sawi a, Sawrkarin kuthnathawktute hmakhua atan sum leh pai hman a tum a, mipuite chu sawrkar atanga hamthatna dawngtu ‘beneficiary’ mai ni lova sawrkar thawhpuitu ‘partner’ ah an ngai tih sawiin, hmasawnna rahbi nghet leh tluantling zawh puiah a sawm a ni.

Khawbung Block Agriculture Office, Vaphai hi Border Area Development Project 2013-2014 sum cheng nuai 10 hmanga sak a ni a. Kum 1979 atanga ding tawh Agriculture Department Circle Office chu March ni 9, 2021 khan Block Agriculture Office-ah hlan kai niin, Khawbung RD Block hnuaia khua te a huam a ni.

Animal Feed Processing Plant hi Vaphai Primary Agriculture Credit Society te din a ni a. Warehouse, Pisa, Kudam, Transformer leh a panna kawng laih nan cheng nuai 47 sen a ni a. Thlai herna khawl leh hriak herna khawl hi sawrkar laipui scheme PMJVM hnuaia Van Dhan Vikas Kendra kaltlangin Cooperation Department ten an bun sak a ni.