Serchhip Consumer Co-op. Society Ltd. Assembly nei

Serchhip Consumer Co-operative Society Ltd. chuan nimin khan Serchhip Kawnpui VC Hall-ah Annual Assembly neiin an hmalakna hrang hrangte thlirho a ni.
Serchhip Consumer Co-operative Society Ltd. ten Annual Assembly hi an Chairman R. Lalngaihawma chuan kaihruaiin Report hrang hrang ngaihthlak a ni a, Report atanga a lan danin Serchhip Consumer Co-operative Society Ltd. ah hian tun dinhmunah Share Holder mi 222 an awm mek a. Covid-19 avanga dawr hawn hleihtheiha a awm loh hnu leh Society Dawr dinhmun tlachhe tawh taka a awn hnuah Dawr chu tihnun thar leh mek a ni a, sum dinhmun pawh a thang chho ve hret hret zel tih an tarlang a, Society din chhan chu Dawr siam a nih angin Society a lo than chhoh zel theih nan Member ten mawh-phurhna kan nei tih sawiin, thahnemngai taka Society chu dawr thin turin an ngen bawk a ni.

Nimin-a Assembly-ah hian Vice Chairman H. Malsawma chuan fuihna thu a sawi bakah Mizoram Co-operative Apex Bank, Serchhip Branch atangin Branch Manager Lalhunthara leh PC. Lalhmangaihzuala te chuan Awareness Campaign neiin hun an hmang bawk a ni.