Sawrkar in power man cheng vbc. 211 ba; Nikumah sawkarin power man-ah vbc. 163 hloh

Mizoram sawrkar chuan June 14, 2024 thleng khan Power leina man ba cheng vbc. 211.15 a nei a, pawisa bat zat hi che ve rengin nikum chhunga power atanga sawrkar hloh hi vbc. 163.91 nia chhut a ni.

RTI hmanga Zalen in an zawhna SPIO, Engineer-in Chief, Power & Electricity Department in a chhanna atanga a lan danin nikum 2023-2024 chhung khan State pawn atanga Power leina atan cheng vbc. 531.95 pekchhuah a ni a, hei hi chawhrualin thla tin cheng vbc. 44.33 power leina atan seng ang a ni a. Nikum (2023-24) chhung vek khan sawrkar chuan mipui (consumer) hnen atangin power hman man cheng vbc. 368.04 a hmu a, hei hi chawhrualin thla tin vbc. 30.67 hmu ang a ni. Mizoram-ah hian April 1, 2024 thlengin Electricity Consumer 2,93,931 awm mekin khaw 13 êng pek lohna khua a la awm a, heng khuate hi Revamped Distribution Sector Scheme (RDSS) hmanga tihên turah hmalak mek a ni bawk a. Tafiff order (FY 2024-25) tarlan angin tun dinhmunah sawrkarin chawhrualin Unit khat zelah Rs. 3.607-in power hman man mipui a tumsak (subsidise) mek a ni.

Mipuiten hnianghnara kawlphetha (power) hmang turin Mizoram chuan kum 2024-2025-ah kawlphetha mega watt 190, kum 2025-26-ah 200MW, kum 2026-27-ah 211MW leh kum 2027-28-ah 221MW a mamawh dawn niin 20th Electric Power Survey of India chuan a chhut niin an sawi a. Mizoram chhunga hmun 14-ah Power siamchhuah a ni tih sawi bawkin, heng zinga 13 hi State sawrkar ta a ni a, pakhat, 60 MW pe chhuak thei Tuirial chu NEEPCO kutah a awm niin an sawi a. Mizorama power siamchhuah (Tuirial) hi kum 2023-24 chhung khan Unit khat Rs. 7.35-in sawrkar chuan a lei tih an sawi bawk.

SPIO chuan ni zung chakna hmangin power siamchhuah a awm bawk tih sawiin, hengte hi Khawiva Sub-Station 100 kWp, Sihhmui 100 kWP, Melriat 100 kWp, Kawlphetha building, MINECO 50 kWp, Tlungvel 2000 kWp, Vankal 20 MW bakah Rooftop Solar 10 kWp chin chunglam belhkhawm, a vaiin 6.37MWp te atangin ni zung chakna hmanga power siamchhuah mek a ni tih a tarlang a. Ni zung chakna hmanga power siamchhuah hi sawrkar chuan a lei a, Vankal Solar Park atangin Unit khat Rs. 3.94 leh Rooftop Solar atanga tharchhuahte chu Unit khat Rs. 2.98-in a lei niin a sawi bawk. 

Mizoram sawrkarin tuikhuah ‘hydel peoject’-ah hmathar lak tumna a nei tih sawi bawkin Tuivai HEP (210MW), Tuirini (24MW), Tuichang (102MW) leh Tlawng (120MW) te chu siam anih ngei theih nan hma a la tan mek tih an sawi a, Project hna thawk tur hian tihfel ngai (clearance) hrang hrangte tihfel hmasak ngai tam tak a awm a, chungte tihfel a nih hunah hna tan theih a ni dawn tih a sawi a ni.