Mizoram-a Jail hrang hrang ah tang mi 1782 an awm mek

Mizoram-ah Jail tang mi 1,782 an awm mek a, Lung In thenkhatah tang awm thei tur zat bituk aia tam an awm mek thu Prison Department hotute chuan an sawi.

Prison Department chhinchiah danin nimin thleng khan Aizawl-a Central Jail Mipa Ward-ah tang 844 an awm mek a. Central Women Jail-ah tang mi 165 an awm mek bawk a. Aizawl District Jail-ah tang mi 110 an awm mek a, Lunglei District Jail-ah mi 153, Siaha District Jail-ah tang 78, Champhai District Jail-ah 162, Kolasib District Jail-ah mi 114 an tang mek a, Lawngtlai District Jail-ah tang 27awmin Serchhip District-ah Jail tang 53 leh Mamit District-ah tang 76 an awm mek a. Nimin-a Mizo-ram-a Jail tang belhkhawm hi mi 1,782 a ni a. Heng lungin tang belhkhawm zing ah hian kum tling lo tang mi 18 awmin, hmeichhia mi 218 tang an awm mek bawk a, a bak mi 1,546 te hi Mipa an ni.

Tun dinhmunah hian Mizoram-a Tan In-a tang awm thei tur bituk aia tam tang an awm mek a. Central Jail Aizawl-ah tang mi 438 awm thei tura ruahmanah tang mi 844 an awm mek a, Hmeichhe awmna Central Women Jail-ah tang dah theih zat hi mi 96 a nih laiin tun dinhmunah mi 165 tang an awm mek bawk a. Aizawl District Jail chu mi 90 awm theihna  ni mah se tang 110 an awm mek a. Mi 109 tan theihna tura ruahman Lunglei District Jail-ah mi 153 an tang mek bawk. Tang 105 awmna tura ruahman Cham-phai District Jail-ah mi 162 an tang mek a. Jail thenkhat a tawt viau laiin Siaha, Kolasib, Lawngtlai, Serchhip leh Mamit District Jail-ah te chuan tang thei tur zat bithliah aia tlem Jail tang an awm ve thung a ni. Heng Jail tawt zuala tang thenkhat te hi sawrkar in ruahmanna a siam angin Jail thawl zawkah hian sawnchhuah an ni thin bawk a ni.