Bairabi leh Hortoki inkarah Rel a tlan tawh

Bairabi atanga Hortoki inkar chu Rel tlan thei turin peihfel (complete) a ni tawh a, Commission of Railway Safety (CRS)-in Safety Certificate a pek hunah mipui hman/chuan theih tura hawn a ni ang a. Hetihlai hian Bairabi - Sairang Rel kawng chu July, 2025-ah peihfel beisei a ni.

Railway Consultant Hrangtawna chuan KM 17-a thui Bairabi atanga Hortoki-ah Railway bungraw phurin Rel a tlan reng tawh tih sawiin, mipui tan erawh hawn a la ni lo a. CRS-in a him leh him lohte an enfiaha Safety Certificate a pek hunah mipui tana hman theih turin hawn a ni dawn a. Railway thawktute chuan chhiatna thlen palh thei a nih avangin Rel kawng hnaih lutukah mipuite awm hnai lo turin an ngen a, bungrua pawh hnai taka dah lo turin an ngen a. Heng bakah hian Rel kawng siamna hmanruate la bo lo turin an ngen bawk.

Bairabi - Sairang Rel kawng hi Broad Gauge Railway Line tur a ni dawn a. RITES-ten he Rel kawng sial Survey hna hi kum 2005 bawr khan an zofel a. Hna hi sawrkar laipuiin kum 2008-2009 khan sanction-in a tira estimate cheng vbc. 2,384.34 a ni a, hei hi revised zel niin tunah chuan he Rel kawng siam zawh nan hian cheng vbc. 6,547 bawr vel sen ral a ngai dawn a ni.

Bairabi Rel Station leh Sairang Rel Station inkar Rel kawng thui zawng hi KM 51.38 niin Lei dawh lian (major bridge) 55 leh Lei dawh tenau (minor bridge) 87 lai a awm a. Lei dawh lian 55 chunga Rel kawng thui zawng belhkhawm ringawt pawh hi KM 11.61-a thui/sei a ni. Bairabi leh Sairang inkara hian hmun 32 laiah leiverh (tunnel) a awm a, leiverh zawng zawng thui/sei belhkhawm pawh hi KM 12.63 dawn a ni a. Leiverh thui ber sei/thui zawng chu KM 1.88-a thui a ni.