MMFSL chhunga sum tih chingpenna thubuai ah Police ten Chargesheet an thehlut tawh
Mizoram Police chuan Mahindra & Mahindra Financial Services Ltd. (MMFSL) chhunga sum tih chingpenna lian ber, North East States pum tuamtu chu chhui chhoh zel a ni tih sawiin, Assam leh Mizoram chhunga mawhphurtute pawh an nih tawh thu leh Chargesheet thehluh a nih tawh thu an sawi bawk.
Nimin-a Mizoram Police ten thuchhuah siama an tarlan danin Mahindra & Mahindra Financial Services Ltd. (MMFSL) chhunga sum tih chingpenna thubuai ah hian a bultumtu Jakir Habibur Hussain leh a thurualpui mi 19 laka Chargesheet chu CJM Aizawl-ah thehluh a ni tawh a, a bultumtu Jakir Hussain, Area Manager of MMFSL hian a Office, Aizawl Khatla atangin Mahindra Finance Company hnuaia a thawhpuite leh Aizawl-a Car Dealers te nen inremsiamin he inbumna hi a kalpui niin an sawi a. Chhui chianna atangin he pawikhawihnaah hian cheng vbc. 150 vel, Car dealers;- CK Hyundai Cars, NBE TATA, Rafael Nissan leh AIDU Motors Renault te nen tanghovin an tichingpen ngei nia hriat a ni.
He case chhui zuinaah hian Bank account 177, a belhkhawma cheng vbc. 5 awmna hren niin, Car model hrang hrang 15 man a ni bawk a. Heng car hlutna hi cheng vbc. 10.5 vel nia chhut a ni a. Heng bakah hian Customer lem loan lakna - 2035, Seal leh Stamp lem - 25, Laptop – 3, Mobile Phone – 10, SIM Card – 35, Mimal I.D engemaw zat leh pawikhawih nana hman ni ngeia hriat hmanrua eng engemaw man a ni bawk a. Pawikhawihtu a puh te hian Bank Account lem, Mahindra Finance Limited hotu lemchanga a siam bakah Bank Account 12 chu a neitute remtihna tel lovin he pawikhawihna atan hian a hmang niin Police te chuan an sawi bawk.
Tarlan tawh angin he thubuai hi kumin March 20-a Ankit Bagree, Circle Head of Mahindra & Mahindra Financial Services Ltd. (MMFSL) in Aizawl Police Station-a Complaint a thehluh atanga intan a ni a, Mahindra & Mahindra Financial Services Ltd. (MMFSL) hi Vehicle loan pechhuaktu niin Mizoram-a an Area Business Manager Jakir Hussain (41), Tuikhuahtlang, Aizawl (Permanent Resident - Tejpur, Assam) chuan Cehicle loan pekchhuah chungchangah sum a tichingpen nia an hriat thu a sawi a ni.
Hemi hnu March 29, 2024-ah Crime & Economic Offences PS-ah Chanpreet Singh, Business Head, MMFSL chuan FIR a thehluh angin thubuai dang ziahluh leh a ni a. Hnuchhuina atang hian he thila inhnamhnawih mi 20 te hi hriat-chhuah niin June 25, 2024 leh July 10, 2024-ah te Chargesheet thehluh a ni tawh a ni a. Mizoram Police te chuan Hnuchhuina hi la chhunzawm zel a nih thu leh midang inhnamhnawih te pawh an la awm nia hriat a ni tih an sawi a, mihring leh bungrua man belh a awm a nih chuan chargesheet pawh a tul anga siambelh a ni ang tih an sawi a ni.
Mizoram Police thuchhuah chuan he thubuai kaihhnawih ni ngeia hriat ah hian thubuai dang ziah luh a nih leh thu pawh sawiin, Dr. Lalnienga, Deputy Chief Medical Officer, Aizawl West District chuan tunhnai khan SBI Dawrpui Branch-a a CIBIL Score a check-na ah Mahindra & Mahindra Financial Services Ltd. (MMFSL) hnuaiah a hriat lohvin Vehicle loan la anga processed a nih thu a hriat chhuah avangin complaint a thehlut tih an sawi a. Hemi chungchang hi chhui zui mek a nih thu leh hetiang complaint hi mimal, an hriatpui lohva loan lem siamna atana an document an hmansak te hnen atangin a la luh belh zel turah an ngai tih an sawi a ni.
Pawikhawihna thlen dan tlangpui te pawh Mizoram Police te chuan sawiin, lehkha lem siam a nih dan te an sawi a. He thil-ah hian CK Motors Hyundai, NBE Tata, Rafael Nissan leh Aidu Motors Renault te chu an inhnam-hnawih ngei a ni tih hriat a nih thu leh he thil kaihhnawiha mi an man 20 te hming pawh an tarlang tel nghe nghe a ni.