Lunglei-a Council of Ministers thukhawm in AMC leh LMC-a thlan te hlawh tihsan an remti

Chief Minister Lalduhoma kaihhruaiin nimin khan Lunglei-ah Council of Minister thutkhawm neih a ni a, Aizawl Municipal Corporation (AMC)-a Corporator te leh Lunglei Municipal Council (LMC)-a Councillor te hlawh a let thum aia tama pun an remti.

Lunglei HPC Conference Hall-a Council of Ministers thukhawm hian thu ngaihtuah tur chhawpchhuah hrang hrang panga (5) an pawm a, heng zingah hian Aizawl Municipal Corporation (AMC) leh Lunglei Municipal Council (LMC)-a Corporator leh Councillor te hlawh tihsan rawtna hi an pawm a, UD&PA Department changtu Home Minister K Sapdanga’n thuthar thehdarhtute hnena a sawi danin, AMC leh LMC-a Corporator leh Councillor te hlawh punna hi a sang hle a. Aizawl Municipal Corporation (AMC)-a Corporator te hian Rs. 23,500/- an hlawh thin a, hlawh tihsan rawtna nimin-a an pawm tak ang hian Mayor hlawh atan 78,000/- niin Deputy Mayor hlawh atan 72,000/- leh Executive Corporator hlawh atan 55,000/- bakah Corporator hlawh atan 50,000/- a ni a. Lunglei Municipal Council (LMC)-a Chairman hlawh atan 74,400/- an pawm a, Vice Chairman hlawh atan 68,400/-, Executive Councillor hlawh atan Rs. 52,000/- leh Councillor hlawh atana Rs. 47,000/- a ni.

Council of Minister thukhawm hian Finance Department atanga lut Proposal for introduction of the Mizoram Banning of Unregulated Deposits Scheme Rules, 2024 chu a pawm a, PHE atanga lut pahnih ‘The draft Mizoram Ground Water (Control & Regulation) Rules, 2024’ leh ‘Proposal for amendment of the Mizoram Water Supplies (Control) Rules, 2023’ te chu pawm a ni a, heng bakah hian EF&CC Department atanga lut ‘The Mizoram Wood Based Industries (Establishment & Regulation) (Amendment) Rules, 2024’ chu pawm a ni bawk.

Tun tum hi Lunglei khawpui-a Council of Ministers thutkhawm nghah tumkhatna a ni a, Rorelna an tan hmain Chief Minister Lalduhoma chuan, Lunglei mipuite lakah Tha ba an ngah hle tih a sawi a, an sawrkar chuan Lunglei khawpui chu an ngaihthah dawn lohzia tihlanna hmasa atan Council of Ministers Meeting chu an nghat tih a sawi a ni.