Lakhuihthei zawrhchhuah runpui Aizawl-ah nei

Khawzawl District chhunga Lakhuihthei chingtu intelkhawm pawl, Tuichangral Organic Farmer Producer Company Ltd. te Lakhuithei thar zawrhchhuah runpui 'Pineapple Bonanza 2024' chu nimin khan Aizawl a Millennium Centre kawtzawl-ah neih a ni.

Tuichangral Organic Farmer Producer Company Ltd. hi Mission Organic Value Chain Development for North Eastern Region (MOVCD-NER) hnuaia loneitu intelkhawm pawl, Farmer Producer Company (FPC) niin, August ni 16, 2021-ah MOVCD-NER Phase-III hnuaia din a ni a. MOVCD-NER hi State Lead Agency, Mission Organic Mizoram (MOM), Directorate of Agriculture enkawl niin Mizoram chhungah FPC 30 ziahluh tawh an ni a, FPC tinte hian thlai thlan bik Mizo Hmarchate (Bird's Eye Chilli), Sawhthing, Aieng, Thingpuife leh Lakhuihthei te an nei a. Tuichangral FPC te hi Khawzawl District chhunga Lakhuihthei chingtu mi 500 intelkhawm niin, Khawhai-ah Registered Office neiin, Board of Directors member 10 in an thutchilh bakah Chief Executive Officer-in a enkawl mek a. Tuichangral FPC ah hian Khawzawl District chhunga Lakhuihthei chingtu khaw pariat - Chalrang, New Chalrang, Vangtlang, Khawhai, Sialhawk, Tlangmawi, Tlangpui leh Lungtan te an tel a ni.

Tuichangral FPC te Lakhuihthei chin hi ‘Giant Kew Variety’ niin, heng Lakhuihthei te hi Organic (chemical tel lo) a enkawl Organic Certification nei thlap an ni a. Mission Organic Mizoram leh Clover Organic Pvt. Ltd. te hmalakpuina in Mizoram chhung mai bakah State pawn lam thlengin Lakhuihthei an hralhchhuak tawh thin a. Kum 2022 khan Haryana-a Surifresh Extract Pvt. Ltd. te hnenah Lakhuihthei metric tonne 18 lai an hralh mai bakah Mumbai-ah metric tonne 2.6 an hralh chhuak bawk a. Mizo thar Lakhuihthei a tam thei ang ber Mizoram pawna hralh chhuah a nih leh theih nan hma an la chhunzawm mek bawk.

Pineapple Bonanza hi August 2022 atang khan MOVCD- NER hnuaia Mizoram chhunga Service Provider - Clover Organic Pvt. Ltd. te hmalakna hnuaia hman tan niin, State Lead Agency - Mission Organic Mizoram, Agriculture Department nena tangkawpin kumtin neih chhunzawm a ni ta a. Tun hi a tum thumna niin, July ni 26, 2024 thleng a awh ang. Hemi hun chhung hian Lakhuithei metric tonne riat (8) tal hralhchhuah theih beisei a ni a. Khawzawl DC leh DHO Office, Khawzawl District te'n Aizawl-a rawn phurh thlakna tur an ruahman sak a ni.

Nimin-a Pineapple Bonanza 2024 hawnna programme hi Agriculture Department-a Joint Director Lalengzami Haolai chuan kaihruaiin Agriculture Minister PC. Vanlalruata chuan he hun hi a hmanpui a, Tuichangral Organic FPC Ltd. a CEO Vanlalremruatpuia hnen atangin Technical Report ngaihthlak a ni bawk.