Central YMA in Cyclone Remal tuartute hnenah tanpuina cheng nuai 56 chuang an sem

Central YMA chuan Cyclone Remal avanga chhiatna tawkte tanpuina tur sum leh pai an hmuh te chu Inrinni khan Aizawl atangin an semchhuak a, he hunah hian mimal leh pawl hrang hrang hnenah cheng nuai 56 chuang zet an semchhuak a ni.

Cyclone Remal avanga tuartute tanpuina semna hun Central YMA Hall-a buatsaih hi Central YMA Asst. Secretary Fabian Lalfakawma chuan kaihruaiin Central YMA Vice President Prof. Lalnuntluanga chuan YMA chu tanpui ngaite tanpuitu pawl a nih angin lusun mangang, chhiat tawkte tanpuitu pawl a nih thu a sawi a, YMA hi amah maia ropui a nih loh thu leh Mizo mipui, YMA memberte avanga innghahna tlak pawl a nih mai thu sawiin, “Mizote tana pawl ropui leh innghahna tlak, tanpui ngaite tanpuitu YMA ah hian i tui thar zel ang u,” tiin Chhiattawk chhungkua te YMA in a tawrhpui thu leh tanpuina petu zawng zawngte chungah lawmthu a sawi bawk a. He hunah hian Central YMA Treasurer Roneihthanga chuan chhiattawk chhungte tawngtai sakna leh lawmthu sawina hun hmangin chhiattawk chhungte thahnem tak an kal bawk a ni.

Central YMA hian kumin May 28-a Cyclone Remal avanga chhiat tawkte tanpuina atan hian Rs.56,54,000/- semin he chhiatna thlenga nunna chan mi 37 te zingah chhungkaw 11 chu cheng nuai khat theuh pek an ni a, In leh bungraw chhia report an dawn 309 atangin mi 142 te hnenah tanpuina pekchhuah niin heng te hi Inchhia Aizawl khawpui chhunga mi 32 te leh Aizawl khawpui pawnlam a mi 110 te an ni a. Heng bakah hianm bungraw chhia chhungkaw 18 te hnenah tanpuina pek a ni bawk.

Thlanmual chhia Report 16 dawn atangin hmun 9-ah tanpuina pekchhuah a ni bawk a, Hlimen Relief Camp Insak tanpui nan cheng nuai khat pein hliam tuar damlo pakhat Rs. 10,000/- pek a nih bakah Hortoki Joint YMA hnenah ruang zawn buaipuina Rs. 10,000/- an pe a. Sub-Hqrs. huamchhunga mite chu Sub-Hqrs. YMA kaltlangin tanpuina hi pekchhuah a ni.