Baktawng Cluster-a Pangang khawitute hnenah Solar-Electric Bulb leh Solar light sem a ni
SELCO Foundation leh Sericulture Department tangkawpin Pangang vulhtuten Pangang an enkawlna kawnga an tangkai pui tur Pangang vulhna In-a nizung chakna hman tur chu nimin khan Silk Samagra 2 hnuaia Baktawng Cluster-a Eri Rearing House ah bultan a ni a, Pangang thar rang chi (Eri) Rearing House chawm turin heng Solar Light te hi an hlan a. Tun tumah hian a bul tan nan Eri Pangang khawitu mi14 te hnenah Solar Light hi hlan niin Mizoram chhung hmun hrang hrangah Eri Pangang khawitute hnenah Solar bungrua te hi hlan chhunzawm zel tum a ni a, kum 2025 thlengin mi 1500 chuang hnenah hlan hman an tum a ni.
Nimin-a heng Solar bungrua te inhlanna hun Baktawng khuaa hman hi Sericulture Department atangin Extension Officer Remlalliani Zadeng leh Sericulture Demonstrator Baktawng bialtu V. Lalremruati ten an telpui a, Sericulture Demonstrator V. Lalremruati sawi danin Baktawng-ah hian Pangang vulhtu mi 14 an awm mek a, nimin-a nizung chakna hmanga tanpuina an dawn chuan Pangang vulh kawngah hmasawnna a thlen ngei a beisei thu a sawi a. He hun hi SELCO Foundation atangin Operation Manager PB. Lalrinfela chuan telpuiin Department leh kuthnathawktute nena an thawhhona chu lawmawm a tih thu a sawi bawk a ni.
Kum 1995 atang khan Bangalore-ah Dr. Harish Hande leh Neville Williams te chuan SELCO Foundation hi lo dinin, an tum ber chu India rampumah nizung tha chakna hmang power rintlak leh tlo zawk nen thingtlang mite pawh an lo ngelngheh a, an lo changkan chhoh zelna tura India rama thingtlang khuate dawmkan a ni a, hemi atan hian kawng hrang hrangin hma an la thin a ni.
Nimin-a heng Solar bungrua te inhlanna neih zawh a nih hnu hian Sericulture Department leh SELCO mithiamte kaihhruainain farmer 14 te tan hian an Solar hmanrua dawn thar te enkawl dan inzirtirna neih chhunzawm nghal a ni bawk.