Bawrhsap hovin Land Committee thutkhawm neih a ni
Serchhip DC Meeting Hall-a he thutkhawm neih ah hian District Bawrhsap Paul L. Khuma leh Settlement Officer Gaston Vanlalhriatpuia te bakah Khawtlang hruaitu VC te an tel a, House Pass dilna 25 leh Land Lease dilna pahnih, a vaiin dilna lut 27 te chu he hunah hian ngaihtuah a ni.
Land Committte hi In hmun dilna leh Pass renew dilna lo thlifimtu tur an ni a, amaherawh chu Section 17(A) of the Mizoram (Land Revenue) Act, 2013 anga ram teh anih chuan Land Committee-hian a lo thlitfim kher a ngai lo thung a. The Mizoram (Land Revenue) Act & Rules, 2013-in a sawi angin ram diltu chuan dilna Form hi a awmna District Settlement Officer (SO) emaw, Assistant Settlement Officer (ASO) hnenah a thehlut anga. Revenue Department in a ram diltu, a ram awmna VC leh a ram thenawmte hmuh lai ngeia ram hi tehfel a nih hnuah SO/ASO hian ram dilna hi Land Committee Chairman hnenah lo thlitfim turin a chhawpchhuak thin dawn a ni.
The Mizoram (Land Revenue) Act & Rules, 2013-in a sawi angin Serchhip District Headquarters Land Committee hi kum 2021 October ni 21 khan din a ni a, he Committee hian a hmaa hetiang kaihhnawiha thuneitu Site Allotment Advisory Board (SAAB) kha a thlak a ni.