Serchhip-a VC Area 5 Vawk hri lenna hmunah puang
Hemi chungchanga nimin-a Serchhip District AH&Vety Officer Dr. H. Vanlalrawna’n thuchhuah siama a tarlan danin Serchhip khaw chhung – Serchhip Vengchung, Chanmari, Field Veng, New Serchhip ‘S’ leh P&E Veng-ah te hian tunhnaiah Vawk a thi nual a, heng Vawk thi te hi African Swine Fever (ASF) vanga thi an ni tih finfiah a ni tawh a, hei vang hian Serchhip Veng-chung, Chanmari, Field Veng, New Serchhip ‘S’ leh P&E Veng te hi July 12, 2024 atanga thu leh awm hma chuan Vawk hri lenna hmun, Infected Area-ah puan a ni a, Vawk hri lenna hmuna puan tawh te ang bawkin inkaihhruaina siam chu zawm leh tur a ni dawn a. Heng zingah hian Vawk hri lenna hmun atang hian Vawk, Vawksa leh Vawksa atanga thil siam reng reng lakchhuah khapin Vawk talh leh vawksa zawrh khap tlat a ni bawk.
AH&Vety Department chhinchhiahna atanga a lan danin Serchhip Vengchung-ah hian ASF vangin Vawk 7 a thih tawh bakah Vawk 2 suat a ni tawh a. Chanmari-ah hian Vawk 22 thiin 83 suat a ni tawh a, Field Veng-ah hian Vawk 11 thiin New Serchhip South-ah hian Vawk 27 an thih bakah 37 suat a ni tawh a. P&E Veng-ah hian Vawk 5 thi tawhin 15 an suat tawh bawk a ni.
Chhinchhiahna atanga a lan danin kumin ah nimin thleng khan Serchhip District-ah hian ASF vanga vawk thi 1201 awm tawhin nimin bikah Vawk thi 38 a awm belh leh a, nimin khan Vawk 131 suat leh ni bawkin nimin thleng khan Vawk 3187 suat a ni tawh bawk a ni. Nimin bikah Serchhip District-a Khua leh Veng 8-ah ASF vanga Vawk thi awm belh lehin Thenzawl-ah Vawk 15 lai a thih belh leh a, Veng leh khua 16-ah Vawk suat ni bawkin Vawk suat tamna ber Thenzawl-ah 76 zet suat a ni a. Serchhip District-a Veng leh Khua 26-a chhungkaw 919 zet chuan ASF hi an tuar tawh a ni.