Tlangpui - Khawlailung-a Varva Lei hawn a ni

Tuichang bialtu MLA leh Dy. Govt Chief Whip W. Chhuanawma chuan Tlangpui leh Khawlailung inkalpawhna tangkai tak tur Varva Lei chu Inrinni khan a hawng.

Lei hawnna inkhawm Tlangpui Community Hall-a neihah bialtu MLA W. Chhuanawma chuan Tlangpui khawtlang ten sawrkar tha chakna beisei mai lova tanrualna hmanga Lei an dawh chu ropui a tih thu sawiin, “Zoram puma puandarh tlak chanchin ngaihnawm leh ropui a ni,” a ti a. Tlangpui khaw hmalakna chu Mizoram khaw dangte tan pawha entawntlak nia a hriat avangin Assembly House-ah hial pawh a lo sawi chhuak tawh tih a sawi bawk.

He Lei hmang hian Mizoram khawchhak lam leh chhim lam District te inkalpawhna chu nasa takin a hnai thei dawn a, he Lei hi Rs. 5,86,318/- senga dawh niin Tlangpui khawtlangin Rs. 1,90,670/-; Tlangpui Welfare ten Rs. 1,74,100/- leh Bialtu MLA W. Chhuanawma’n Rs. 30,000/- an thawh a, hemi bak zawng Rs. 1,91,548 chu H. Lalsiamliana’n a tum sak a ni. Lei dawh nan hian khawtlang leh mi thahnemngai ten tha leh sum nasa takin an thawh a, heng zawng zawng nena chhut hian cheng nuai 10 chuang seng anga ngaih a ni.