Sawhthing lei leh sawngbawl dan tur sawiho

Chief Minister Lalduhoma hovin nimin khan a Pisa-ah Sawhthing lei leh hralh leh a sawng-bawl (processing) chungchang chu Minister leh Official pawimawh ten an sawiho.

He hunah hian Chief Minister chuan an flagship programme-a thlai thar pali te lei tura an tih chu an tihlawhtling ngei ngei dawn tih sawiin, “Tun atanga thla 6 velah heng thlai te hi a thar chho mai tawh dawn a ni. Chumi hrereng chuan tih tur awm apiang kan lo tih ve zung zung a tul a, chak takin kan inbuatsaih theuh dawn nia,” tiin mawhphurtute chu a chah a. Kuhva chingtute harsatna pawh thapui thawha an bawhzui a tul thu a sawi bawk.

He huna tarlan a nih danin kum tharah hian Mizoram in Sawhthing quintal million khat (1) vel a tharchhuak tura ngaih a ni a. Free Market hmangin lei leh hralh hi kalpui zel tur a ni ang. Amaherawh chu Market a kaltluan theih nan leh loneituten an tharchhuah zawng zawng an hralh theih nana thil tul te he thutkhawm ah hian sawiho a ni a. Sawhthing Minimum Support Price hi January atanga May thla inkarah pek nise an ti bawk. Hei bakah hian Sawhthing hi a hralhna kal tluang (free market) pangngaia loneituten an hralh theih bak, a Grade hniam, Process ngai chi lo awm ta se a kalpui dan tur pawh an sawi nghal a, hemi atana Private Company rintlak te thawhpui dan tur te an rel a ni a. Kuhva chingtute harsatna sutkian dan tur leh hemi atana Mizoram chhunga Processing Plant siam chungchang te pawh an sawiho bawk a ni.