Home Minister in Smart City leh SIPMIU hnuaia hmalakna te a hmunah kalin a enfiah

UD&PA Department changtu Home Minister K. Sapdanga chuan nimin khan Aizawl Smart City Ltd. leh SIPMIU hnuaia hmalakna thenkhat a hmunah kalin a enfiah.

Home Minister K. Sapdanga hian Cyclone Remal avanga Tlawng tuilian in 37 MLD Water Treatment Plant a tihchhiat hnuhma chu enfiahin, he Water Treatment Plant hian April 27, 2024 atang khan Laipuitlang tuizem lian ah nitin tui thianghlim litre maktaduai 10 a pump chho tan a, Laipuitlang tuizem lian in a chawm Veng hrang te hnenah a tui a mamawh ang zelin tui a lo pump chhuak tawh thin a ni. Cyclone Remal avangin Raw Water Pump House chu nasa takin tuilianin a chimpil a, tui pump khawl thuai virtu Electric motor 3 leh Control Panel, Sensor leh thildang engemawzat a tichhia a. Heng khawl rit tak tak leh hnawmhnawkin a bawh mai bawk ah a panna kawng a tlakbal bawk avangin kawng siam chawp a nih hnuah Guwahati a siam turin thawn a ni a. A that hun tur a la sawi theih hrih loh a ni.

37 MLD Water Treatment Plant hi Aizawl Greater Water Supply Phase-I & II nen tangkawpin Aizawl khawpui tui in tur mamawh belhna hi kum 2033 thleng a phuhruk thei tur a duan a ni a. Aizawl khawpui chhungkaw engemawzat mamawh lo phuhru ve thawh thin a. Heng tuilian avanga chhiatna thlengte siamthat nan hian sum tam tak mamawh a ni dawn a, Minister hian SIPMIU in Phase-III siamthat dan tur ruahmanna an siam a enpui bakah rang tak siamthat a nih theih nan theihtawp a chhuahpui tur thu a sawi a ni.

Home Minister hian City Centre, Dawrpui pawh tlawhin bungraw lakluhna duh angin a awlsam loh avangin hmalakna a chak theihloh thu thawktute'n an sawi a. Chutihrual chuan mipui mamawhna hria in, theihtawp chhuah a, mipuiin an chhawr thuai theih tura hma lak an tum thu an sawi bawk a. Multipurpose Ground, High Field te; Solid Waste Management Centre, Luangmual; Plastic Waste Management Centre,  Luangmual leh Tuivamit Playground te tlawhin, hnathawh dan chik takin a enfiah bawk. He hunah hian Minister hi Aizawl Smart City Limited-a CEO leh SIPMIU Program Director bakah an thawhpui ten tawiawmin City Centre sak a enfiahna ah hian Commerce & Industries Department-a thawktute bakah Dawrpui Local Council aiawh te, New Market Sumdawng Joint Association leh Lushai Engineers aiawh ten an lo dawngsawng a ni.