Mizoram-ah ASF vangin Vawk thi a la awm belh zel

Vawk pul hri African Swine Fever (ASF) avangin Mizoram-ah Vawk a thih belh zel a, chhinchhiahna atanga a lan danin kumin January thla atanga tun thlengin ASF vangin Mizoram-ah Vawk 1488 a thi tawh a, Vawk 3002 suat a ni tawh bawk.
AH&Vety Department hotute sawi danin Vawk pul hri hian District 7 tuamin khaw 80 a nghawng tawh a, niminpiah khan Vawk thi 64 awmin Vawk suat 235 a awm a, sawrkarin tun dinhmunah rampawn leh State pawn atanga Vawk lakluh khap mahse Vawk hri hian Mizoram hmun hrang hrang a tuam mek zel a ni.

Chhinchhiahna atanga a lan danin kum 2021 chhung khan ASF vangin Mizoram-ah Vawk 33,417 a thi a, kum 2022 khan Vawk 12,795 thiin kum 2023-ah Vawk 1,039 a thi bawk a. ASF hri leng tur venna atan hian kum 2021 khan Vawk 12,568 suat a ni a, kum 2022-ah Vawk 11,686 suat niin kum 2023-ah Vawk 928 suat a ni bawk.

Serchhip District-ah pawh ASF hri hi hluar hluai lo mah se  Vawk thi leh suat a awm belh zel a, Serchhip District-ah hian Chhing-chhip leh Khumtung khua te chu ASF hri lanna ah hian puan ni tawhin Chhingchhip-ah hian ASF vangin Vawk 26 a thi tawh a, nimin khan Vawk 61 zet suat leh a nih avangin Vawk 570 zet suat a ni tawh a. Khumtung khua ah hian ASF vanga Vawk thi 55 awm tawhin nimin-a vawk suat 4 te nen Vawk 151 zet suat a ni tawh bawk. Hetihlai hian Chhiahtlang leh Baktawng khua te chu ASF leng thei dinhmun ah a ding nia hriat a nih avangin an khua a VC te chuan hri leng laka an him theih nan chak takin hmalakna an kalpui ve leh tan mek a ni.