May thla chhungin ASF vangin Vawk 850 a thi

May thla chhung khan Mizoram-ah Vawk pul hri, African Swine Fever (ASF) vanga Vawk thi 850 awmin Vawk suat 1764 a awm bawk. AH & Vety Department Deputy Director Dr. M. Zohmingthangi chuan tun dinhmunah Mizoram-ah ASF hri len nasat hunlai a nih chhoh mek thu sawiin, June leh July thla ah phei hi chuan tun aia nasa zawka hri a len a rin thu a sawi a. Tun dinhmun ah ASF avanga zangnadawmna dawng turte tan chhawmdawlna pekchhuah a la ni lo tih a sawi bawk. Nimin khan Mizoram-ah ASF vanga Vawk thi 32 awm lehin Vawk suat 41 a awm leh bawk a. Kumin January atanga nimin thleng khan Mizoram-ah ASF vanga Vawk thi zat chu 1186 tling tawhin Vawk suat tawh zat chu 1876 a ni.