MPSC hotu ten Exam an buatsaih thin dan an sawifiah

Mizoram Public Service Commission (MPSC) hotute chuan MPSC in Exam a buatsaih thin dan sawifiahin, an Chairman JC. Ramthanga chuan MPSC chu a rintlak zel dawn thu a sawi.

Nimin-a MPSC Pisa a thuthar thehdarhtute an kawmna ah MCS (Combined) Examination 2023 ah dik lo taka duhsak zawngte ti tling anga sawi leh thuthang awm mek chu anmahni kaltlanga Exam beitute rilru ah leh mipuiah boruak tha lo leh hlauhthawnna a thlen palh theih avangin, tunhmaa an lo chin vak loh, Exam an kalpui dan chu mipui hriata sawi a ngai tih MPSC Secretary Vanlalmawia chuan a sawi a. Kum 1991-a MPSC din atangin MPSC Exam kalpui danah sawiselna liantham a awm hriat a nih ngai loh thu leh hei hi MPSC-in hna lakna (recruitment) a kalpuiah dik leh fel taka a kalpui thin vang a ni tih a sawi a. Direct Recruitment a kalpuiah, Written Exam zawhna chhanna en dan (evaluation) phung fel tak neiin, chhawng thum - First evaluator leh Second evaluator ten inhrepawh tawn miah loa mark an pek chu Third evaluator (scrutinizer) in a lo enkawp a, chumi atang chuan Final Mark siam a nih thu a sawi a ni.

MPSC-a Controller of Examination Zosangzuali Pachuau chuan evaluation kalpui dan hi a paper entirin a sawifiah a. MCS Exam a ni emaw, Exam dang an kalpui reng rengah pawh Written Exam-a evaluator-ten mark/remarks an pekna ah ziahran ho nawhreh an neih chang a awm a, evaluator dawt lehte kut a thlen hmaa tih thin niin, kalphungah an lo neih tawh a nih vangin rinhlelhawm lam zawngin an lo ngai ngai lova, tun tuma result-a lungawilote hnenah pawh ngaihngam takin RTI-a an dil angin an pechhuak mai tih a sawi a. Scrutinzer-in a endik hnuah MPSC Confidential Section-ah a lut a, thawktuten an lo endik nawn leh vek a, Final Marks hi Personal Interview neitu Chairman leh Member dangte hnen a thleng ngai lo hrim hrim zawk tih a sawi a. Interview an neih zawh vek hnuah chauh Written Marks hi pein, chumi atang chuan belhkhawm a ni chauh tih a sawi bawk.

MPSC Chairman JC. Ramthanga chuan Exam leh thil dang dang ah MPSC chu theihtawpin a siamthat hna an thawk ve tih sawiin, Sawrkar pawhin Commission hnathawh dan tur hi a duhtui deuh deuh a, Secretary post pawh IAS Cadre Post ni tawh turin Notification a tichhuak tawh tih a sawi a. MZP-in a ban an phutna chungchanga zawhna ah, chuti zawngin a ngaihtuah loh thu a sawi a, “MPSC hi a rintlak a, rintlakin hna kan thawk zel dawn a ni,” a ti a. MCS (Combined) Exam 2023 a mark pek dana lungawilote chu mi pahnih niin, Gauhati High Court Aizawl Bench-ah Writ Petition an thehlut tih zawhna chhanga sawiin, MPSC chuan Court-a khin an tawhin chak loh an la neih loh thu an sawi bawk a ni.