MP inthlan lo awm tur Kristian nuai chimih duhtute leh Sakhaw tihbik neilo inbeihna tur niin sawi

MPCC President Lal Thanzara chuan MP Inthlan lo awm tur chu Kristian nuai chimih duhtute leh Sakhaw tihbik neilo inbeihna tur niin a sawi.

Nimin-a Lunglei Press Club-a thuthar thehdarhtute a kawmna ah MPCC President Lal Thanzara chuan MP inthlan lo awm tur chu Kristian nuai chimih duhtute leh Sakhaw tihbik neilo inbeihna tur nia sawiin, hetiang anih laia MNF MP Candidate in a lo tling a nih chuan Kristian leh hnam hnufual zawkte nuai chimih duhtu NDA lamah thut a tum thu a sawi chu Pathian tana sengkhawmtu nilo in thehdarhtu a nih mai a hlauh thu a sawi a, ZPM Candidate in lo tling ta se a thutna lam tur a sawi ngamlo chuan kan Sakhaw Puithiamte rilru a tina niin a sawi bawlk. MPCC President chuan Congress MP Candidate kan thlantlin chuan Opposition ah lo awm palh pawh nise Kristian State kan nihna anga Kristian nekchep tumtu dodal ngam MP kan thlan avang ringawt pawhin khawvel hmuhah kan mawi dawn a ni, a ti bawk.

He hunah hian Mizoram MP Inthlanpui neih tura Congress Candidate Lalbiakzama chuan BJP sawrkar chu a Vawk lallen tawh nia sawiin, Prime Minister Modi chuan Chanchinbumi tepawh hmachhawn duhlo in, Party dang hruaitute thubuai siam sak dan ringawt an buaipui niin a sawi a. BJP sawrkar chuan Kristiante mai nilo keini Mizo mipuite leh kan tlangmi puite min hmusit em em tih sawiin, BJP sawrkar paihthla turin Mizoram-ah pawh Congress kan thlantlin a ngai niin a sawi bawk.