Ministry of Defence in Subedar Thanseia ui thu sawi

Ministry of Defence chuan March 31, 2024-a lungphu chawl-a boral Indopui 2-naa ram tana pasaltha Subedar Thanseia chu an ui takzet tih an sawi.

Subedar Thanseia hi March ni 31, 2024 zing dar 5:00 khan Tlangnuam Veng-ah kum 102 mi niin a thi a, hemi ni vek hian vuiliam niin amah hi Assam Regiment hmasa ber zinga mi a ni. Ministry of Defence thuchhuah tarlan danin ram tana pasaltha Subedar Thanseia hi Indopui 2-na laiin Battle of Kohima indona-ah huaisen takin ram tan a ding a, Jessami-a an awm chhungin Assam Regiment tan hnutchhiah tha tak neiin a hming tha hle a, ram tana sipai a tan chhungin theihtawp chhuah thin mi, Duty tura koh chuan tlanchhe ngai lo nia sawiin, Battle of Kohima-a a thil tih hian harsatna hlauhawm tak karah tangrual sipaite tan hnehna pawimawh tak a siam a, Khawchhak lama buaina lian zawk chhuak thei turah danglamna a siam tih an sawi a ni.

Ministry of Defence thuchhuah chuan Subedar Thanseia chu Sipai atanga a chawlh hnuah khawtlang leh ram tan nasa taka inpe in zirna hmasawn zelna atan leh hranghlui tan bakah sipai chawl ta te tan a tangkai hle tih tarlangin, a nun chu thangthar zel te tan entawntlak tak a nih thu leh India sipai zawng zawng ten an ui takzet tih an sawi a a, Assam Regiment ten a hmunah thlah liamin zahna an lantir a, ram zalenna atana a thil tih chu hriatreng a ni tawh dawn tih an sawi a ni.

Ministry of Defence chuan Subedar Thanseia chanchin chu hun kal tawh sawina mai ni lovin hmalam hun atan leh sipai kum naupang zawk te tana infuihtharna ni chhunzawm zel tura an duh thu pawh sawiin, kum naupang zawk ten zir tur an neih theih nan leh midang te nuna ram tana tha zawka inpek duhna a awm theih nan a chanchin chu a awm reng dawn tih an thuchhuah ah hian an sawi bawk a ni.