Tourism Minister in TAP hnuaiah Training a hawng

Tourism Minister Lalrinpuii chuan nimin khan Chaltlang Tourist Lodge, Conference Hall-ah ni thum chhung awh tur ‘Tourism Awareness Programme (TAP) for Training of Tourist Service Providers in Mizoram’ chu a hawng.

He Training hawnna hunah hian Tourism Minister chuan Tourism chu kan ram sum dehchhuahna pawimawh tak anih thu sawiin, mipui tel tamna, Community based Tourism a pawimawh thu a sawi a. Tourism tih hian State dang leh ram dang (foreign) atanga rawn kal mai bakah Local tourism a huam tel thu pawh sawiin, tih hmasawn a tul thu a sawi a, Department chu facilitator chauh an nih thu leh Stakeholder-te an pawimawh thu a sawi bawk. Hei bakah hian Tourism Minister chuan kan ram tourism hmasawnna atana pawimawh tak pakhat chu Marketing anih thu sawiin, Website leh Social Media lam hman tangkai a pawimawh thu a sawi bawk.

Mizoram sawrkar chuan Allocation of Business a tihchhuah ah Tourist Service Providers-te: Travel Agents, Tour Operators, Accommodation Units, Catering Units leh Restaurants, Spa leh Resort te chu Tourism Department hnuaiah dahin, Tourism Department guidelines, Mizoram Registration of Tourist Trade Act-2020 chu a duang a. Hemi hnuaiah hian Tourist Service Providers-te hi in register vek tura duan niin tunah hian Hotel 60; Homestay 97; Guesthouse/Inns/Lodge/Motels etc 20’ Travel Agents 35; Tour Operators 11; Catering Units 29 leh Restaurants 700 aia tam an inziaklut tawh a, Registration drive hi kalpui zel turin hmalak mek a ni bawk.