Specialist leh Doctor indaihlohna phuhru tura hmalakna mek a nih thu Health Minister in a sawi

Health Minister Lalrinpuii chuan nimin-a Mizoram Legislative Assembly Session-ah Specialist leh Doctor indaihlohna phuhrukna tura hmalakna mek a ni tih sawiin, Doctor lak thar turte thingtlang-ah awm an duh loh thu a sawi a, “Zoram Medical College (ZMC) a mite an rawn Graduate hunah kan zia ang,” a ti.

Nimin-a Mizoram Legislative Assembly thutkhawm ah member hrang hrangte zawhna leh zawh belhna te chhangin Health Minister Lalrinpuii chuan Specialist leh Doctor indaihlohna phuhrukna tura hmalakna mek a nih thu sawiin, MPSC kaltlangin Specialist Doctor 7 la tura ruahman mek a nih thu leh tunhnaiah AYUSH Doctor 5 lak a nih tawh bakah Specialist post 3, GDMO leh Dental Surgeon post pakhat ve ve la turin DP&AR ah dil mek a nih thu a sawi a. Medical Officer lak a nih dawnin a nghet a nih dawn loh chuan lak tur an hmu zo lo thin tih sawiin, Doctor hna dil thei ten Medical Officer hnaruak a nghet lo a thawh an hreh avang leh thingtlang lama an awm hreh avangin thawktu tur an awm lo thin tih a sawi a. “National Health Mission hnuaiah pawisa an awm ve pawhin thingtlanga awm duh lo,” a ti a. ZMC-a MBBS Batch hmasa berte chu April, 2024 tawpah an chhuak dawn tih sawiin, MBBS zirlaite hian bond an sign vek a, kum 2 chhung tal sawrkarah an thawh a ngai dawn tih a sawi a. April thla lo awm tura Doctor zirchhuak an awm leh hunah chuan heng Doctor indaihlohna tam tak a ziaawm theih beisei a nih thu a sawi bawk a ni.

MLA inthlan dawnah PHC pasarih (7) chu CHC-ah hlankai an nih thu pawh sawiin Health Minister chuan, “Sawrkar hmasa thil tih a ni a, tih hlawhtlin thuai thuai a chakawm khawp mai. Chutih rualin, thawktu indaihlohna avangin a nih tur angin a function thei rih lo. Kan in daih hunah a nih tur ang taka function tir a ni ang,” a ti a. Sawrkar hmasain Health Care Scheme Corpus Fund atan Asian Development Bank-ah cheng vbc. 1,000 an biak fel thu sawiin, June, 2024-ah agreement ziah tura inbiak fel a nih thu a sawi a. Mizoram khaw hrang hranga sawrkar hmasain Health Clinic hawn tura a ruahman khaw thenkhatte chu zirchian mek a nih thu a sawi bawk.

Health Minister Lalrinpuii chuan South Vanlaiphai PHC chungchang pawh zawh belhna chhanga sawiin, PHC-ah hian khum 10 a awm thin thu leh South Vanlaiphai PHC hi February thla khan tlawhin damdawi In thar lo sain khum 10 awm theihna thin ah khum 6 chauh a leng ta tih a sawi a. Khum 6 pawh hi a chep tih Minister chuan sawiin, ngaihtuahna thar sengin, a building hlui la awm, la tha tho chu chei thar dan te a awm chuan khum dang 4 hi dah theih dan awm se tia Official te nen ngaihtuahna an sen mek thu te pawh a sawi bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar