Smart City hnuaia khelmual siam a te hlawm niin sawi

Sports Minister Lalnghinglova Hmar chuan Smart City sum hmanga khelmual siam an enfiah zingah meter 105-a thui leh meter 68-a zau tling pakhat chiah a awm tih House a hrilh a, cheng vaibelchhe tam tak senna tur a Ground tling lo lutuk ruahman a ni chu a pawi a tih thu a sawi.

Nimin-a Session chhunzawm ah Siaha Bialtu MLA Dr. K. Beichhua zawhna kal zela khelmual hrang hranga Phullem phah chungchang hi Sports Minister chuan sawifiah a, tuna Ground hman pangngai chu a dung meter 105 leh a vang meter 68 a nih thu sawiin, hetihlai hian Smart City hnuaia khelmual siam te an enfiah hnuah meter 105 leh meter 68 tling pakhat awm tih loh chu a zim lutuk vek tih a sawi a, hnathawh nan cheng vbc. 20 te dah a ni chunga Ground te lutuk chu siamrem dan a awm em tiin UD&PA Minister, Smarty City hotute leh Contractor te nen inrawnin an enho thu a sawi a. Zemabawk, Tuivamit, Chite leh Edenthar a mite an enfiahnaah Field te hi a tling lo zel a, a then chu a hmuna zir loh vang te a nih thu a sawi a, a vaiin tling vek thei lo mah se, a tlin theihna hmunah chuan sum tam tak senga sawrkarin a ruhman a nih chuan a bikin FIFA in a size atana khelmual a duh ang chu tlin tir zel a duhawm hle tih a sawi a, pawisa hlawm lian, cheng vbc. tam tak senna tura Ground tling lo lutuk a ruahmna awm chu pawi a tih thu a sawi bawk.