Rel kawng siamna thir rukbo hmuhlet sak a tam

Kawnpui Police Station-a Duty te chuan nikum (2023) leh kumin (2024) chhung hian Rel kawng siamna hmanrua thir chi hrang hrang rukbo a nih thu leh an hmanrua ruk a nih chungchangah FIR 11 an dawng tawh a. FIR an dawn atang hian thubuai pahnih ziahluh niin thir rukbo hmuhlet sak kg 400 chuang an nei tawh.

Kawnpui Police Station-a chhinchhiah a nih danin nikum (2023) chhung khan Rel kawng siam hna thawktu Contractor hrang hrangte atangin Thir leh thil dang bo avangin FIR pariat an dawng a, kumin-ah pathum dawng tawhin thubuai pahnih ziahluh a ni tawh a. Kumin chhunga FIR an dawna Rel kawng siamna bungrua bo zawng zawng hi a vaiin cheng nuai 17 hu a ni a, nikum chhunga thil bo an report hlutna hi cheng nuai 9 hu vel niin a hlutna an ziahlan loh engemaw zat report a ni bawk.

Kawnpui Police Station chuan heng Rel kawng siamna thil bo report an dawn an bawhzuina atang hian kg 400 vel an hmuh letsak tawh tih sawiin, Police-te bungraw hmuhlet tam zawk chu thirchhia leikhawmtute hnen atang niin sawi a. Thudawnna dang chuan Rel kawng atana hman thir bo te hi leiverh (tunnel) chhung, a thim deuh laia awm leh Lei (bridge)-a mite an ni deuh ber a, thil bo tam zawk chu mihring tha maia ruk bo vek theih a ni lo niin an sawi bawk.

Rel kawng siam meka hmanraw ruk bo a nih thin chungchangah hian Kawnpui Police Station-ah Kawnpui Joint VC leh Police te chuan thirchhia lei thinte chu a kokhawm tawh a, Police-te chuan rel kawng siamna hmanrua bote hi report an dawn angin chak taka bawhzui zel a ni dawn tih leh rutu leh lo lei chhawngtute chu dan angin an um zui zel tur thu an hriattir tawh a ni.