Mizoram-ah World Hearing Day hman a ni

National Health Mission (NHM) hnuaia National Programme for Prevention and control of Deafness (NPPCD) buatsaihin nimin khan Ri hriatna lama harsatna neite ni ‘World Hearing Day’ hman a ni.

World Hearing Day hi kum 2007 atang khan kumtin March ni 3-ah hman thin a ni a, kumin hian Pathianni-ah a tlak avangin nimin khan Aizawl Press Club-ah thuthar lakhawmtute nen he ni pual hian hun hman a ni a, he hun hi PwD Commissioner Vanlaldiki Sailo chuan khuallian nia hmanpuiin thuthar lakhawmtu te chu rualbanlo te’n an dikna chanvo an chan theihna tur puangzartu pawimawh tak an nih thu a sawi a, hemi kawngah hian theihtawpin hma la chhunzawm se a duh thu a sawi bawk.

PwD Commissioner chuan RPwD Act hi rualbanlo te humhalhna dan tha tak a nih thu sawiin, rualbanlote’n nasa tak in hma a sawn tawh tih a sawi a. NPPCD thawktu te hmalakna ah lawmthu sawiin, mithiam rual te enkawlna hnuaia rualbanlo te tan mel lung pawimawh tak a nih tawh thu leh bengngawng te hmuhchhuahna kawngah leh tanpuina an pek tawh te a ropui hle tih a sawi bawk. He hunah hian Dr. Lalramnghaki ENT Surgeon, NPPCD Civil Hospital Aizawl chuan kumin-a World Hearing Day thupui behchhanin thu a sawi bawk a ni.