Mizoram Lok Sabha Inthlanpui neih tur atan April 19, 2024-ah Vote thlak a ni dawn

India ram Lok Sabha Inthlanpui 2024 chu thla thar April 19 atang khian rampum-ah neih a ni dawn a, he inthlanpui hi thawh 7-ah neih tur niin Vote tla te hi June 4, 2024 khian rampum-ah a ruala chhiar a ni dawn a, inthlanpui neih tur atan hian Political party hrang hrangte pawh an inbuatsaih chho mek a ni.

Inrinni kalta March 19, 2024 khan Election Commission of India-a Chief Election Commissioner Rajiv Kumar chuan New Delhi-ah thuthar thehdarhtute kawmin India ram Lok Sabha Inthlanpui neih hun tur hi a puang a, kumin a Lok Sabha Inthlanpui hi thawh 7-a neih tur niin April ni 19 atangin Vote hi thlak a ni dawn a ni. Vote thlak thawh 1-na ah hian Lok Sabha Seat 102 atan April ni 19-ah vote thlak a ni dawn a. April ni 26-ah a thawh 2-na atan seat 89-ah vote thlak a ni ang. Vote thlak thawh 3-na chu May ni 7-ah neiin Seat 94-ah inthlanna neih a ni anga, May ni 13-ah seat 96 atan thawh 4-na vote thlak a ni anga. A thawh 5-na atan Parliament bial 49-ah May ni 20 khian vote thlak a ni anga. Lok Sabha inthlan thawh 6-na atan May ni 25-ah bial 57-ah vote thlak lehin inthlan chhawng tawp berna, a thawh 7-na atan June ni 1-ah Lok Sabha Seat 57-ah Vote thlak leh a ni anga. Heng inthlanna hrang hranga vote tla te hi a rualin June 4-ah chhiar a ni dawn a ni.

India ram Lok Sabha Inthlanpui neih hun tur puan a nih hnu hian Mizoram Chief Electoral Officer (CEO) Madhup Vyas IAS chuan Inrinni tlai khan Aizawl-ah thuthar thehdarhtute kawmin Mizoram-a Lok Sabha Inthlanpui neih tur chungchanga inbuatsaihna hi a puang nghal a. Mizoram-a Lok Sabha Seat khat chuh tura Inthlanna neih tur hriattirna hi tun thla ni 20-ah tihchhuah a ni anga, inthlan chuh tumte tan hming pek luh theih hun chu March ni 27 thleng hawngin a tuk March ni 28-ah inthlan chuh tumte hming pekluh chu endik a ni anga, March 30, 2024 thlengin inhnukdâwk duhte tan hun hawn a ni anga, April 19-ah mipui ten Vote thlakin Vote tla te hi ram chhung hmun dang rualin June ni 4-ah chhiar a ni ang.

February 8, 2024-a Electoral Roll tlangzarh taka a lan danin Mizoram pumah Vote nei thei 8,61,277 awm mekin an zinga 4,14,777 chu mipa niin midang 4,41,520 chu hmeichhia an nih bakah Service Voters 4,980 an awm a, Vote nei tamna ber District chu Aizawl niin Vote nei thei 2,88,268) an awm a, Vote nei thei tlemna ber District chu Hnahthial niin Vote nei 16,257 a ni thung. Vote nei tamna ber Assembly Bial chu 36-Tuichawng, Lawngtlai District niin Vote nei thei 36,493 an awm a, Vote nei thei tlemna ber Bial chu 34-Thorang, Lunglei District niin Vote nei thei 15,152 an awm bawk.

Mizoram pumah Mipa za zela hmeichhe awm zat chu 1064 niin Mamit District-ah chauh hmeichhe vote nei aiin mipa vote nei an tam zawk a ni. Youth voter (kum 18-19 inkar) hi 36,214 an awm a, Senior Citizen (kum 85 leh a chunglam) 4,758 awmin Vohbik vote nei (Persons with Disability electors) hi 3,399 an awm bawk.

Kumin a Mizoram Lok Sabha Inthlanpui ah hian Polling Station 1276 awm tura ruahman niin kum 2019-a Lok Sabha Inthlanpui aiin 101 in an tam zawk dawn a, Hmeichhe hlang enkawl leh vohbik hlang enkawl tur Polling Station pakhat theuh Assembly bial tinah a awm anga, Model Polling Station pakhat tal Constituency tinah siam tum niin, ECI thupek angin Critical Polling Station zawng zawng leh Polling Station zawng zawng zatve aia tlem lovah vote thlak lai lo vilna turin webcasting tih tum a ni bawk. Hei bakah hian Postal Ballot/Home Voting chu Vohbik leh Senior citizen ten an duha an hman theih turin ruahman a ni ang.

Inthlanpui venhimna thawk turin State Police mi 3000 chuang leh Central Armed Police Forces (CAPF) company 15 vel an duty dawn a, dan leh thupek tha taka kenkawh a nih theih nan ruahmanna siam a ni bawk.