Kawng enfiah tur tir nghal

Lawngtlai District-a Vathuampui kawng Concrete Pavement chhun dan diklo tarlanna video darh chungchang chu Sawrkar chuan a ngai thu takin a enfiah turin PWD SDO leh JE an kal a, a tul dan angin hmalakna kalpui nghal a ni dawn.

Thudawn danin he Video viral hi tunkar Thawhlehni a mi ni a hriat a ni a, a landan chuan kawngpui a Cement an chhun dawn hian kawng chhuata vaivut chu tifai lovin tui pawh leihuh mumal lovin chhun deuh tawp niin a hriat a ni.

He kawnga Granular Sub Base(GSB) hi 125mm a chhah hi kum 2021 khan thawh zawh vek tawh a ni a, sum pawh pek vek tawh a ni a, a chungah Cement chhun tur hi thawh zawh mai a nihloh vangin GSB phah hian Fur hnih a paltlang a, Cement chhun dawnin  a chhelai te chu phah nawn a, a che lo lai ah pawh vailut in a khuhte tifaia Cement hi chhun chauh tur a ni. Vathuampui kawng siam ah hian Contractor chu Lalthanthuami, Chawnpui Aizawl niin cheng nuai 2088 vel senna a ni a, hna hi August 14, 2019-ah thawh tan a ni a, hnathawh hunchhung hi vawikhat pawhsei niin, tun thla 31-ah zawh tura ruahman a ni.